Nıgerııada jyl basynan beri Lassa bezgeginen qaıtys bolǵandar sany 127-ge jetti

ABÝDJA. KAZINFORM — Sońǵy aptada eldegi alty shtatta Lassa bezgeginiń 14 jańa jaǵdaıy tirkelip, beseýi qaıtys boldy, dep jazdy Anadoly.

Nıgerııadaǵy Aýrýlardy baqylaý ortalyǵy (NCDC) sońǵy aptada eldiń alty shtatynda Lassa bezgeginiń 14 jańa jaǵdaıy tirkelgenin, bes adamnyń qaıtys bolǵanyn habarlady.

Ortalyqtyń málimdemesinde qańtar aıynan beri elde Lassa bezgeginiń jalpy 674 jaǵdaıy tirkelgeni, al bul aýrýdan kóz jumǵandar sany 127-ge jetkeni atap ótilgen.

Atalǵan derttiń ólim-jitim deńgeıi 18,8%-dy qurap otyr, bul ótken jyldyń osy kezeńimen salystyrǵanda (18,5%) sál joǵary.

Ótken jyly Nıgerııa boıynsha bul indetten 190 adam kóz jumǵan.

Nıgerııa úkimeti 2019 jyldyń 23 qańtarynda Lassa bezgegine baılanysty tótenshe jaǵdaı jarııalaǵan bolatyn.

Lassa bezgegi — Malı, Togo, Gana, Lıberııa jáne Serra-Leone syndy Afrıkanyń kóptegen elderinde taralǵan ınfektsııalyq aýrý. Bul aýrý alǵash ret 1969 jyly Nıgerııanyń soltústik-shyǵysyndaǵy Borno shtatynda anyqtalǵan.

Aýrý kóbine kemirgishterdiń nájisimen baılanys arqyly juǵady, sondaı-aq adamnan adamǵa da juǵýy múmkin. Aýrý ólimge ákeletin qan ketý arqyly ótetin bezgek túrimen sıpattalady.

Bılik halyqty tyshqandarmen jáne basqa da kemirgishtermen baılanysýdan aýlaq bolýǵa shaqyryp otyr.

Buǵan deıin habarlanǵandaı, Nıgerııada jyl basynan beri menıngıtten mert bolǵandar sany 156-ǵa jetti.