Nıgerııada jarylys jasaýǵa 7-8 jastaǵy balalar paıdalanyldy
ASTANA. QazAqparat - Nıgerııanyń soltústik-shyǵysyndaǵy Borno shtatynda ornalasqan Maıdýgýrı qalasyndaǵy bazarda 7-8 jastaǵy eki qyz bala jarylǵysh zattary bar beldikti iske qosty.
Saldarynan bir adam qaza taýyp, 8 adam jaraqat aldy, dep habarlaıdy «QazAqparat» HAA Bı-Bı-Sı-ge silteme jasap.
Eki jarylys araǵa birneshe mınýt salyp jasaldy. Bul ýaqytta bazarǵa kelýshiler sany óte kóp bolǵan. Eki qyz da jarylys kezinde mert boldy. Jergilikti halyq jasaǵynyń ókili Abdýlkarım Jabo jýrnalısterge qyzdar bazarǵa kelgennen keıin, dereý onyń ortasyna qaraı bet alǵanyn málim etti. «Men olardyń birimen bastapqyda haýsada, keıin aǵylshyn tilinde sóılesýge talpyndym, biraq ol til qatpady», - dedi Jabo. Keıin ol qyzdardyń biri saýda qatarlaryna jaqyndap, jarylǵysh zatty iske qosqanyn kórgen.
Jarylys úshin jaýapkershilikti ázirge eshkim óz moınyna alǵan joq. Nıgerııalyq «Boko Haram» toby buǵan deıin de balalardy jankeshti retinde paıdalanǵany málim. Sońǵy aılarda nıgerııalyq jasaq sodyrlardy birshama yǵystyrdy, degenmen «Boko Haram» áli kúnde deıin jarylystar uıymdastyryp turady.
