Nıgerııada jankeshtiler jasaǵan birqatar terakt saldarynan 23 adam qaza tapty
ASTANA. KAZINFORM - Nıgerııanyń soltústik-shyǵysyndaǵy Borno shtatynda jankeshtiler uıymdastyrǵan shabýyldardan 23 adam kóz jumdy, dep habarlaıdy Anadoly.
Shtat polıtsııasynyń resmı ókili Nahým Daso málimdemesinde osy oqıǵalar bolardyń aldynda keshke shtat astanasy — Maıdýgýrıdiń úsh túrli bóliginde shabýyl jasalǵanyn habarlady.
Onyń aıtýynsha, teraktiler saldarynan 23 adam qaza taýyp, 108 adam jaralanǵan.
Daso shabýyldar qaladaǵy bazarda, aýrýhanada jáne jaıaý júrginshilerge arnalǵan kópirde bolǵanyn naqtylady. Aldyn ala tergeý derekteri boıynsha, jarylystardy jankeshtiler jasaǵan.
Óz kezeginde Borno shtatynyń gýbernatory Babagana Zýlým bul shabýyldardy aıyptap, olardy «múlde jol berýge bolmaıtyn, jabaıy ári adamgershilikke jat áreket» dep atady.
Zýlým beıbit turǵyndarǵa jáne ǵıbadat oryndaryna jasalǵan shabýyldardyń, ásirese musylmandar dinı rásimderin atqaryp jatqan kezede, múlde qabyldanbaıtynyn atap ótti.
Ázirge bul shabýyldar úshin eshbir uıym jaýapkershilik alǵan joq. Alaıda mundaı teraktilerdi jıi uıymdastyratyn Boko Haram toby kúdikke ilinip otyr.
2000-jyldardyń basynan beri Nıgerııada áreket etip kele jatqan «Boko Haram» 2009 jyldan bastap aýqymdy terrorlyq shabýyldar uıymdastyryp, ondaǵan myń adamnyń ómirin qıǵan.
2015 jyldan beri top kórshiles Kamerýn, Chad jáne Nıger aýmaqtarynda da shabýyldar jasap keledi. Chad kóli basseıni óńirinde onyń áreketterinen keminde 2 myń adam qaza tapqan.
Teraktiler men qarýly qaqtyǵystar saldarynan el ishinde júzdegen myń adam óz úılerin tastap ketýge májbúr boldy.
Osyǵan deıin AQSh Nıgerııaǵa taǵy 200 áskerı qyzmetker jiberetinin málimdegen bolatyn.
