Nıgerııada tyrysqaq indetinen qaıtys bolǵandar sany 359 adamǵa jetti

ASTANA. KAZINFORM – Nıgerııanyń aýrýlardy baqylaý jáne aldyn alý ortalyǵynyń (NCDC) málimetinshe, jyl basynan beri elde tyrysqaq indetin juqtyrýdyń 10 857 jaǵdaıy anyqtalyp, aýrýdan 359 adam qaıtys bolǵan. Bul týraly Anadoly aqparat agenttigi habarlaıdy.

Málimdemede aıtylǵandaı, bıyl elde tyrysqaq aýrýyn juqtyrý jaǵdaılarynyń sany kúrt ósken. Oqıǵalar sanynyń 220 paıyzǵa artýy úlken alańdaýshylyq týdyrdy.

Osy ýaqyt ishinde indet el astanasy Abýdja men Afrıka eliniń 36 shtatyna tarady.

Tyrysqaq indetine baılanysty Nıgerııada 26 maýsymda tótenshe jaǵdaı jarııalandy. Ótken jyly elde tyrysqaqpen aýyrǵan 3 myńnan astam adam tirkelip, 100-den astamy qaıtys bolǵan.

Tyrysqaqty «Vıbrıon» bakterııalary týdyrady. Ol tamaq jáne sý arqyly taralyp, aýyr dıareıa men aǵzanyń sýsyzdanýyna ákeledi. Em bolmaǵan jaǵdaıda, ol ólimge soqtyrady.

Nıgerııada taza sýdyń jetispeýshiliginen basqa, juqpaly aýrýlardy juqtyrý jáne olardan ólim qaýpi tıisti medıtsınalyq qyzmetterdiń bolmaýynan kúsheıip otyr.

Elde bezgek, polıomıelıt, ish súzegi jáne maımyl sheshegi vırýsyn juqtyrý jaǵdaılary jıi kezdesedi.