Nıgerııada tyrysqaq aýrýynan 13 adam qaıtys boldy

ASTANA. KAZINFORM – Nıgerııanyń ortalyq bóliginde ornalasqan Nıger shtatynda tyrysqaq indeti taralyp, sońǵy málimetter boıynsha 13 adamnyń ómirin qıdy. Bul týraly shtattyń bazalyq medıtsınalyq qyzmetter jónindegi komıssary doktor Ibragım Ahmed Dangana málimdedi, dep jazady Anadolu.

Onyń aıtýynsha, aýrý óńirdiń alty aýdanynda taralǵan. Qazirgi ýaqytta tirkelgen jaǵdaılardyń jalpy sany 239-ǵa jetti. Іndettiń aldyn alý maqsatynda zardap shekken ár aýdanǵa arnaıy emdeý jáne oqshaýlaý ortalyqtary ashylǵan.

Dangana elde tyrysqaq derekteri kóbeıip jatqandyqtan, 2024 jylǵy 26 maýsymda «ulttyq tótenshe jaǵdaı» rejımi jarııalanǵan eske saldy.

Tyrysqaq – Vibrio cholerae bakterııasynan týyndaıtyn jedel ishek ınfektsııasy. Ol lastanǵan sý nemese taǵam arqyly juǵyp, qatty ish ótý men sýsyzdanýǵa ákeledi. Ýaqytyly em qabyldanbasa, aýrý ólimge soqtyrýy múmkin.

Nıgerııada bul ınfektsııanyń taralýyna basty sebep – taza aýyzsýdyń jetispeýshiligi men sapaly medıtsınalyq kómektiń qoljetimsizdigi. Elde tyrysqaqtan bólek, bezgek, polıomıelıt, súzek jáne maımyl sheshegi sekildi ózge de qaýipti aýrýlardyń jıi órship turatyny baıqalady.

Dúnıejúzilik densaýlyq saqtaý uıymynyń málimetinshe, Nıgerııa – tyrysqaqtan eń kóp zardap shegip otyrǵan Afrıka elderiniń biri.

Aıta keteıik, buǵan deıin Nıgerııada Lassa bezgeginen qaza tapqandar sany 151 adamǵa jetkenin jazdyq.