Nıgerııada sý tasqynynan qaza tapqandar sany 151 adamǵa jetti

ABÝDJA.  KAZINFORM — Nıgerııanyń batysyndaǵy Nıger shtatynda nóser jańbyr men sý tasqyny saldarynan qaza tapqandar sany 151 adamǵa jetti. Bul týraly shtattyń Tótenshe jaǵdaılar basqarmasynyń (SEMA) ókilderi habarlady, dep jazdy Anadoly agenttigi.

Agenttik dırektory Ibragım Hýsseını jýrnalısterge bergen málimdemesinde, Mokova aýdanynda nóser jaýyn saldarynan bolǵan tasqynnan 3000-nan astam adam úılerin tastap ketýge májbúr bolǵanyn aıtty. Onyń aıtýynsha, 11 adam jaraqat alǵan, al júzdegen úı sý astynda qalǵan.

Nıgerııa Prezıdenti Bola Ahmed Tınýbý zardap shekken aımaqtarda qutqarý jáne gýmanıtarlyq operatsııalardy kúsheıtý týraly tapsyrma berdi. Bul tapsyrma Ulttyq tótenshe jaǵdaılar agenttigine (NEMA) jáne kúshtik qurylymdarǵa baǵyttaldy.

Tropıkalyq klımattyq aımaqta ornalasqan Nıgerııa jaýyn-shashynnyń mol túsýimen jıi betpe-bet keledi. Eldiń Sý resýrstary mınıstrligi buǵan deıin birneshe aımaqta nóser jaýyn men tasqyn qaýpi týraly eskertý jasaǵan bolatyn.

Ótken jyly da osyndaı aýa raıy jaǵdaılarynan 1235 adam qaza taýyp, 1,2 mıllıonnan astam turǵyn úılerin tastap ketýge májbúr bolǵan edi.