Nıgerııada sý tasqynynan 21 adam qaza tapty

ASTANA. KAZINFORM — Daily Nigerian gazetiniń Nıgerııa memlekettik tótenshe jaǵdaılar jónindegi agenttigine silteme jasap habarlaýynsha, Nıgerııanyń ortalyǵyndaǵy sý tasqynynan 20-dan astam adam qaza tapqan, dep jazady Report. 

Aldyn ala málimet boıynsha, Mokva provıntsııasynda uzaqqa sozylǵan tolassyz jaýyn sý tasqynyna sebep boldy. Saldarynan 50 úı turǵyndarymen birge sý astynda qaldy.

Agenttik basshysy Ibragım Hýseını oqıǵa saldarynan 21 adam qaza taýyp, 10 adam iz-túzsiz joǵalǵanyn aıtty. Onyń aıtýynsha, 3 adam aman qalǵan. Olarǵa Mokva qalasyndaǵy ortalyq qonaqúıde medıtsınalyq kómek kórsetilip jatyr.

Sý basqan óńirde izdeý-qutqarý jumystary bastaldy.

Eske sala keteıik, Nıgerııada sodyrlardyń shabýylynan 15 fermer qaza tapty.