Nıgerııada sodyrlardyń shabýylynan keıin 35 polıtseı joǵalyp ketti
ASTANA. QazAqparat - Nıgerııada «Boko Haram» radıkaldyq toby sodyrlarynyń polıtseılik akademııaǵa shabýylynan keıin 35 quqyq qorǵaý organdarynyń qyzmetkerleri joǵalyp ketti, dep habarlady Lenta.ru.
Oqıǵa Borno shtatyndaǵy Gvoza qalasynyń mańynda boldy. «Sodyrlardyń sońǵy shabýyly barysynda joǵalyp ketken polıtseılerdi tabýdyń barlyq qajetti sharalary qolǵa alynýda», - dep málimdedi ulttyq polıtsııa ókili.
Sonymen birge ol tártip saqshylaryn «Boko Haram» tobynyń músheleri urlap ketti dep asyǵys qorytyndy jasaýǵa bolmaıtynyn naqtylady. Onyń aıtýynsha, keıbir polıtseıler óltirilýi, al basqalary óz ómirlerin qorǵaý úshin akademııadan qashyp shyǵýy múmkin.
Budan buryn tamyzda «Boko Haram» sodyrlary Gvozany basyp alǵan bolatyn, áskerı toptardaǵy derekkózdiń aıtýynsha, Nıgerııa Qarýly Kúshteri ony bosatý úshin arnaıy operatsııa josparyn jasaýda.
2014 jylǵy sáýirde Nıgerııa ókimeti «Boko Haram» Shıbokte 276 oqýshy qyzdy urlap ketkennen keıin lańkestikke qarsy aýqymdy operatsııa júrgizýde. Sol kezde ıslamshylar qyzdardy quldyqqa satatyndyǵyn nemese kúshtep kúıeýge beretindigin aıtqan bolatyn. Keıinnen jergilikti polıtsııa adamdar urlaýdy uıymdastyrýshyny ustap, oǵan aıyptar taǵyldy.
2014 jylǵy qańtardan beri lańkester júzdegen jergilikti turǵyndardy tutqynǵa aldy jáne 2 053 adamdy óltirdi.
