Nıgerııada sodyrlar urlap áketken 100 oqýshy qyz bosatyldy
ASTANA.KAZINFORM - Nıgerııa bıligi qarasha aıynyń sońynda sodyrlar urlap áketken Áýlıe Marııa katolıktik mektep-ınternatynyń 303 oqýshysynyń 100-in bosatty, dep habarlaıdy DW.
100 bala Nıgerııa astanasy Abýdjaǵa keldi. Olar 8 jeltoqsanda Nıger memlekettik bıligine tapsyrylýy tıis.
- Biz olardyń oralýyn jalbaryna tiledik. Eger bul ras bolsa, keremet jańalyq, - dedi mektepti basqaratyn Kontagora eparhııasynyń ókili Danıel Atorı.
22 qarashada Nıgerııadaǵy hrıstıandar qaýymdastyǵy Nıger shtatynyń Papırı qalasynda ornalasqan Áýlıe Marııa mektep-ınternatynan 303 oqýshy men 12 muǵalimniń urlanǵany týraly habarlady. Keıinirek tutqyndardyń 50-i qashyp qutylǵan.
Nıgerııadaǵy qarýly bandalar jyldar boıy eldiń soltústik-batys jáne ortalyq bólikterindegi aýyldyq jerlerden adamdardy aqsha úshin urlap kelgen. Bul shabýyldarda myńdaǵan adam qaza tapty. Qaraqshylar birneshe shtatty qamtıtyn keń ormandy alqapta jasyrynyp júr.
Eń tanymal oqıǵalardyń biri 2014 jyldyń sáýirinde boldy, sol kezde «Boko Haram» terrorıstik tobynyń sodyrlary Chıbok qalasyndaǵy orta mektepten 276 qyz oqýshyny urlap ketken. Keıinnen kópshiligi terrorısterden qashyp qutyldy. Amnesty International uıymynyń málimeti boıynsha, 2024 jylǵy jaǵdaı boıynsha urlanǵan qyzdardyń 82-si iz-túzsiz joǵalyp ketken.