Nıgerııada sodyrlar meshitke shabýyl jasap, 27 adamdy atyp ketti

ASTANA. KAZINFORM – Nıgerııanyń Katsına shtatyndaǵy meshitke namaz ýaqytynda jasalǵan qarýly shabýylda kem degende 27 adam qaza tapty, dep habarlaıdy Al Jazeera. 

Jergilikti turǵyndardyń aıtýynsha, oqıǵa Malýmfashı aýdanyndaǵy Ýngývan Mantaý aýylynda tań namazy kezinde bolǵan. Qarýly adamdar jergilikti ýaqyt boıynsha saǵat 04:00 shamasynda meshit ishine oq jaýdyrǵan. Shabýyl úshin jaýapkershilikti ázirge eshkim moınyna alǵan joq.

Keıingi jyldary mundaı shabýyldar Nıgerııanyń soltústik-batys jáne soltústik-ortalyq aımaqtarynda jıi oryn alýda. Bul aımaqtarda malshylar men fermerler jer men sý resýrstarynyń shekteýliligine baılanysty jıi qaqtyǵysady. Meshitke jasalǵan shabýyldan zardap shekkender de bar.

Bolashaq shabýyldardyń aldyn alý úshin Ýngývan Mantaý aımaǵyna armııa men polıtsııa kúshteri ornalastyryldy. Qarýly toptar jaýyn-shashyn kezinde egistik alqabyna tyǵylyp aýyldarǵa jıi shabýyl jasaıdy.

Maýsym aıynda Nıgerııanyń Benýe shtatynda bolǵan teraktide 100-den astam adam qaza tapqan bolatyn. Amnesty International úkimetti «kúndelikti qantógisti» toqtatýǵa shaqyrdy. 

Eske sala keteıik, Nıgerııadaǵy qarýly shabýylda 34 sarbaz qaza tapty.