Nıgerııada sodyrlar 25 oqýshy qyzdy urlap, muǵalimin óltirip ketti

ASTANA. KAZINFORM — Nıgerııanyń soltústik-batysyndaǵy Kebbı shtatynda qarýly top Maga kentindegi mektep-ınternatqa basyp kirip, 25 oqýshy qyzdy urlap ketti, dep habarlaıdy Bild. 

Shabýyl tańǵy saǵat 4:00 shamasynda boldy: qaskúnemder mototsıkldermen kelip, aldymen muǵalimniń úıine kirip, ony atyp tastady, sodan keıin kúzetshini óltirip, qyzdardyń uıyqtaıtyn bólmesine basyp kirdi. 

Polıtsııanyń resmı ókili Nafıý Abýbakar Kotarkosıdiń aıtýynsha, shabýyldaýshylar zamanaýı qarý-jaraqpen qarýlanǵan jáne kúzetshilermen atysqan. Arnaıy bólimsheler qazirgi ýaqytta urlaýshylardy tabý jáge qyzdardy bosatý úshin qashý joldary men jaqyn mańdaǵy ormandardy tekserip jatyr. Turǵyndar kem degende eki adamnyń qaza tapqanyn habarlady.

— Bizge olardyń kóp mototsıklmen kelgeni aıtyldy. Olar aldymen muǵalimniń úıine tikeleı baryp, ony óltirdi, sodan keıin kúzetshini atyp tastady, — dedi jergilikti turǵyn Abdýlkarım Abdýllahı Maga.

Ázirge eshbir top jaýapkershilikti óz moınyna alǵan joq. Nıgerııada adamdardy aqsha alý úshin urlaıtyn kóptegen qarýly top bar. 2014 jyly Chıbokta «Boko Haram» sodyrlary 276 oqýshy qyzdy urlap ketkennen beri elde keminde 1500 oqýshy urlanǵan.

Buǵan deıin Nıgerııada terrorıster 73 adamdy urlap áketkenin jazǵan edik.