Nıgerııada shabýyldan qaza tapqandar sany 160-qa jetti
Nıgerııanyń ortalyǵyndaǵy Plato shtatynda bolǵan qarýly shabýyl saldarynan kem degende 160 adam qaza taýyp, taǵy 300-den astam adam jaraqat aldy. Birneshe eldi mekenniń turǵyndary taǵy qarýly shabýyl bolady dep qorqyp, úılerin tastap ketýge májbúr boldy. Kazinform agenttigi bul týraly Euronews-ke silteme jasap habarlaıdy.
Senbi jáne jeksenbi kúnderi Nıgerııanyń Plato shtatyndaǵy birneshe kentte qarýly adamdar jasaǵan shabýyldan keminde 160 adam qaza tapty, dep habarlaıdy Frans-Press aqparat agenttigi jergilikti bılikke silteme jasap.
Buǵan deıin 16 adam mert bolǵany aıtylǵan.
300-den astam adam jaraqat aldy, úsh myńnan astam adam shabýyl qaıtalanady dep qorqyp, úılerin tastap ketýge sheshim qabyldady.
Bul aımaqta sońǵy birneshe jyl dinı jáne etnıkalyq qaqtyǵystar jalǵasyp keledi.
Amnesty International quqyq qorǵaý uıymy shabýyldardan keıin Nıgerııa úkimetin synap, bıliktiń «Plato shtatyndaǵy eldi mekenderge jıi jasalatyn shabýyldardy» toqtata almaǵanyn aıtty.