Nıgerııada Lassa bezgeginiń órshýinen 31 adam kóz jumdy

ASTANA. KAZINFORM — Nıgerııanyń aýrýlardy baqylaý ortalyǵy málimetinshe, bıyl qańtar aıynan beri Nıgerııada Lassa qyzbasynyń órshýi eldiń 9 shtatyn qamtydy. 

Habarlanǵandaı, 5 apta ishinde 165 aýrý jaǵdaıy tirkelip, sonyń saldarynan 31 adam qaıtys bolǵan. Medıtsınalyq ortalyqtarda 135 naýqas baqylaýda bolǵan, sondaı-aq keminde 110 kúdikti jaǵdaımen baılanysta bolǵan adamdar qadaǵalanǵan.

Ótken jyly elde Lassa vırýsynan 215 adam kóz jumǵan.

Lassa qyzbasy Afrıkanyń birneshe elinde, sonyń ishinde Malı, Togo, Gana, Lıberııa jáne Serra-Leonede kezdesedi. Aýrý alǵash ret 1969 jyly Nıgerııanyń soltústik-shyǵysyndaǵy Borno shtaty aýmaǵynda tirkelgen.

Aýrý kemirgishterden juǵady, adamnan adamǵa da taralýy múmkin jáne ólimge ákeletin gemorragııalyq qyzbany týdyrady.

Bılik turǵyndardy egeýquıryqtarmen jáne basqa kemirgishtermen baılanystan aýlaq bolýǵa shaqyrýda.

Nıgerııa úkimeti Lassa qyzbasyna baılanysty 2019 jylǵy 23 qańtarda tótenshe jaǵdaı jarııalaǵan. 

Aıta ketelik Kolýmbııada sary bezgektiń órshýine baılanysty tótenshe jaǵdaı jarııalanǵan edi.