Nıgerııada Lassa bezgeginen kóz jumǵandar sany 162-ge jetti

ASTANA. KAZINFORM – Nıgerııada janýarlardan adamǵa juǵatyn vırýsty dert - Lassa bezgegine shaldyqqandar sany jyl basynan beri 162 adamǵa jetti. Bul týraly Nıgerııanyń Aýrýlardyń aldyn alý jáne baqylaý ortalyǵynyń (CDC) habarlamasynda aıtylǵan, dep jazady Anadoly.

Habarlamadaǵy málimetterge sáıkes, dertti juqtyrý jaǵdaılary el astanasy Abýdjada ǵana emes, taǵy 21 shtatta tirkelgen.

-2023 jyldyń 25 tamyzy men 31 tamyzy aralyǵynda aýrýdy juqtyrýdyń 10 jańa jaǵdaıy tirkelgen. Osylaısha, 1 qańtardan 31 tamyzǵa deıin jalpy naýqastar sany 871-ge, ólim-jitim  162-ge jetti, — delingen habarlamada.

Sonymen birge málimetterde eldegi kúdikti jáne rastalǵan jaǵdaılardyń jalpy sany ótken jylǵy sáıkes kezeńnen tómen ekeni aıtylǵan. Alaıda ınfektsııanyń taralý qaýpi áli de bar.

Ótken jyly Lassa bezgegi 190 adamnyń ómirin qıdy. Nıgerııa úkimeti 2019 jyldyń 23 qańtarynda osy aýrýǵa baılanysty tótenshe jaǵdaı jarııalaǵan bolatyn.

Lassa bezgegi Afrıka qurlyǵynyń kóptegen elderinde taralǵan, sonyń ishinde Malı, Togo, Gana, Lıberııa jáne Serra-Leone sıqty elder bar. Nıgerııada bul aýrý alǵash ret 1969 jyly eldiń soltústik-shyǵysyndaǵy Borný shtatynda tirkeldi.

Infektsııa kemirgishterden jáne adamnan adamǵa juǵady, aýyr gemorragııalyq bezgek týdyrady.

Bılik halyqty tyshqandar men basqa da kemirgishtermen baılanystan aýlaq bolýǵa shaqyryp otyr.

Osyǵan deıin Nıgerııada Lassa bezgeginen qaza tapqandar sany 151 adamǵa jetkeni týraly jazdyq.