Nıgerııada qarýly top 234 oqýshy qyzdy urlap alyp ketti
ASTANA. QazAqparat - Nıgerııanyń soltústik-shyǵysynda belgisiz qarýly top 234 oqýshy qyzdy urlap áketti, dep habarlaıdy 24 kz.
Qarýly top Chıbok qalasyndaǵy mekteptiń kúzetshilerin óltirip, 16-18 jas aralyǵyndaǵy qyzdardy alyp ketken. Basynda mektep dırektory shyndyqty jasyryp, 129 oqýshynyń urlanǵanyn aıtty. Olardyń 28-i óz betinshe qashyp qutylyp, úılerine oralǵan. Biraq Borno shtatynyń gýbernatory qalaǵa ózi kelip, turǵyndarmen kezdesý kezinde ata-analardan joǵalǵan qyzdardyń sany shyn máninde 234 ekenin estip biledi. Jergilikti baspasózdiń jazýynsha, urlyqty osy aımaqtaǵy jaýyzdyq áreketterimen aty shyqqan «Boko Haram» lańkestik uıymy jasaýy múmkin. Jyl basynan beri sodyrlar qolynan 800-ge jýyq adam qaza tapty.
