Nıgerııada qarýly shabýyldan 58 adam kóz jumdy
ASTANA. KAZINFORM — Nıgerııanyń soltústik-shyǵysyndaǵy Taraba shtatynda belgisiz qarýly adamdar eldi mekenge shabýyl jasap, 58 adam qaza tapty. Polıtsııanyń málimetinshe, jeksenbi kúni taǵy 15 adamnyń máıiti tabylǵan. Qutqarý jumystary áli jalǵasyp jatyr, dep habarlaıdy Sınhýa.
Taraba shtaty polıtsııa basqarmasynyń baspasóz hatshysy Vıktor Mshelıza juma kúni Karım-Lamıdo aýdanyndaǵy Bınnarı eldi mekeninde bolǵan shabýyldan qaza tapqandar sany 58-ge jetkenin aıtty. Onyń sózinshe, jeksenbi kúni oqıǵa ornynan qashyp ketken 15 adamnyń máıiti tabylǵan.
Polıtsııa ókiliniń málimetinshe, shabýyl eldi mekende apta saıyn ótetin bazar kúni bolǵan. Qaza tapqandardyń deneleri mańaıdaǵy butaly jerler men ózennen tabylǵan.
Sondaı-aq zardap shekkenderdi jaqyn mańdaǵy eldi mekenge jetkizý kezinde qaıyq aýdarylyp ketken. Polıtsııa ókili taǵy birneshe adamnyń habar-osharsyz ketken bolýy múmkin ekenin aıtty.
Jergilikti BAQ-tyń habarlaýynsha, qaýipsizdik qyzmetkerleri bastapqyda 40-tan astam adamnyń máıitin tapqan. Tórt saǵatqa sozylǵan shabýyl kezinde qarýly adamdar jurtqa beıbereket oq jaýdyryp, úıler órtengen. Sonyń saldarynan birneshe otbasy baspanasyz qalǵan.
Taraba shtatynyń úkimeti málimdemesinde aman qalǵandar men zardap shekken otbasylarǵa gýmanıtarlyq kómek tarata bastaǵanyn habarlady.
Ázirge shtattaǵy shabýyl boıynsha eshbir qarýly top jaýapkershilikti moınyna alǵan joq. Sońǵy jyldary bul óńirde qaýymdar arasyndaǵy qaqtyǵystar, qaraqshylyq áreketter jáne etnıkalyq-dinı qaıshylyqtar saldarynan adam ólimine ákeletin zorlyq-zombylyq jıilegen.
Aıta keteıik, bıyl Nıgerııanyń soltústik-shyǵysyndaǵy shabýylda 17 polıtsııa qyzmetkeri qaza tapqan bolatyn.
