Nıgerııada qarýly shabýyldan 14 shahter qaza tapty
ASTANA. KAZINFORM — Nıgerııanyń soltústik-batysyndaǵy Zamfara shtatynda altyn óndiretin shahtaǵa jasalǵan qarýly shabýyldan 14 shahter qaza taýyp, kóptegen adam jaraqat aldy. Bul týraly Anadoly jazdy.
Shabýyl Marý aýdanyndaǵy Gobırava Chalı aýylynda bolǵan. Shabýyldyń nysany — jergilikti altyn ken oryndarynyń birinde jumys istep júrgen jumysshylar bolǵan.
Nıgerııa uzaq jyldar boıy qarýly bandylar men eldiń ártúrli aımaqtarynda áreket etetin «Boko Haram» jáne «Batys Afrıkadaǵy Islam memleketi» (ISWAP) sııaqty lańkestik toptardyń zorlyq-zombylyq áreketterine tap bolyp keledi.
Nıgerııada adamdardy urlaǵany úshin ólim jazasy qarastyrylǵanyna qaramastan, elde aqsha úshin adam urlaý oqıǵalary áli de keńinen taralǵan. Bandalar kóbinese eldiń soltústik aımaqtaryndaǵy aýyldardy, mektepterdi jáne jolaýshylardy tutqynǵa alyp, olar úshin tólem talap etedi.
Aıta keteıik, buǵan deıin Nıgerııanyń ortalyq Plato shtatynda belgisiz sodyrlar tobynyń shabýylynan 40-tan astam adam qaza tapqanyn jazdyq.