Nıgerııada qarýly adamdar 300-den astam balany urlap ketti

ASTANA. KAZINFORM — Nıgerııada osy aptada ekinshi ret balalardy jappaı urlaý oqıǵasy tirkeldi, dep habarlaıdy VVS.

Qarýly adamdar Nıger shtatyndaǵy Papırı qalasyndaǵy Áýlıe Marııa katolık mektebine basyp kirip, balalar men muǵalimderdi urlap ketken.

Nıgerııa hrıstıan qaýymdastyǵynyń málimetinshe, 303 bala men 12 mektep qyzmetkeri (4 áıel jáne 8 er adam) urlanǵan.

Buǵan deıin 215 bala men 12 muǵalimniń urlanǵany habarlanǵan edi. Alaıda Kontagora eparhııasynyń epıskopy keıinirek urlanǵan oqýshylardyń sany áldeqaıda kóp ekenin málimdedi.

— Biz Papırıdegi mektepten shyqqannan keıin barlyǵyna qońyraý shalyp, tekserip, qosymsha suraý saldyq. Alaıda qashýǵa árekettengen taǵy 88 oqýshynyń ustalǵanyn bildik, — dedi ol.

Osylaısha, mekteptegi 629 oqýshynyń jartysyna jýyǵy urlanǵandar tizimine endi.

Polıtsııanyń habarlaýynsha, qarýly adamdar Áýlıe Marııa mektebine basyp kirip, oqýshylardy jataqhanasynan urlap ketken. Polıtsııa tutqynǵa túsken oqýshylardy tabý úshin ormandy aralaýǵa kiristi.

Prezıdent Bola Tınýbý óziniń sheteldik saparlaryn, sonyń ishinde osy demalys kúnderi Ońtústik Afrıkada josparlanǵan G20 sammıtin — eldegi qaýipsizdik máselelerin sheshý úshin keıinge qaldyrdy.

Osyǵan deıin Nıgerııada sodyrlar 25 oqýshy qyzdy urlap, muǵalimin óltirip ketkeni týraly jazdyq.