Nıgerııada qaraqshylar bes aýyldyń 35 turǵynyn óltirip ketti
PRETORIıA. QazAqparat - Nıgerııanyń soltústik-batysyndaǵy Zamfara shtatynda birneshe qaraqshylar shabýylynan kem degende 35 adam qaza tapty. Bul týraly QazAqparat Agence France-Presse agenttigine silteme jasap habarlaıdy.
Mohamed Shehý shtaty polıtsııasy ókiliniń málimdeýinshe, bes aýylda 35 adam óltirilgen. Qaraqshylar jurtty tonaýmen jáne urlaýmen aınalysqan.
AFP kýágerlerdiń aıtýynsha, shabýyldar 8 shildede jasalǵan, al qaza bolǵandardyń jalpy sany 43 adamǵa jetedi. Óz kezeginde Nıgerııanyń Premium Times gazeti Zamfara shtatynyń Farý aýdanynda 7 shildede jergilikti turǵyndar qarýmen qorqytqan eki qaraqshyny óltirgennen keıin aýyldarǵa shabýyl jasalǵanyn atap ótti. Al juma kúni Reuters agenttigi qaraqshylar Farý qalasyna shabýyl jasap, 45 turǵyndy óltirdi dep habarlady.
Nıgerııada ekinshi jyl qatarynan beıbit turǵyndarǵa jasalǵan bandalyq shabýyldar sany edáýir artty. Qylmyskerler adamdardy óltiredi, tólem úshin kepilge alady, mal urlaıdy, turǵyndardy qorqytady, ártúrli bopsalaýlardan óndirip alady. Qaraqshylar sonymen birge qaýipsizdik máseleleri boıynsha bılikpen yntymaqtasqan aýyldar men qalalardy nysanaǵa alady. Órship otyrǵan bul qylmysqa qarsy turý úshin bılik arnaıy polıtsııa men armııa bólimderin paıdalanýǵa májbúr. Jergilikti mılıtsııa bólimsheleri de qurylýda.
