Nıgerııada qaraqshylar shabýylynan 9 adam qaza tapty

ASTANA. KAZINFORM – Nıgerııanyń soltústik-batysyndaǵy Zamfara shtatynda qylmystyq top músheleriniń qarýly shabýylynan toǵyz adam qaza tapty, dep habarlaıdy Anadoly.

Jergilikti aqparat quraldarynyń málimetinshe, shabýyl Tofa aýdanynda bolǵan. Qarýly qaraqshylar jergilikti turǵyndarǵa oq jaýdyryp, sodan keıin ondaǵan adamdy urlap áketken.

Nıgerııa kóp jyldan beri qarýly qylmystyq toptar men terrorıstik uıymdardyń, sonyń ishinde «Boko Haram» jáne DAISh-tyń Batys Afrıkadaǵy fılıaly (ISWAP) tarapynan jasalatyn zorlyq-zombylyqpen kúresip keledi.

Elde adam urlaý qylmysy úshin ólim jazasy qarastyrylǵanyna qaramastan, ásirese tólem talap etý maqsatyndaǵy urlyq-oqıǵalar keń taralǵan kúıinde qalyp otyr.

Qaraqshylar eldiń negizinen soltústik óńirlerindegi aýyldarǵa, mektepter men kólik quraldaryna jıi shabýyl jasaıdy.

Aıta keteıik, maýsym aıynda Malı shekarasyna jaqyn jerde Nıgerııanyń qaýipsizdik kúshteriniń pozıtsııalaryna jasalǵan qarýly shabýylda 34 sarbaz qaza taýyp, 14-i jaralanǵan edi.