Nıgerııada qaraqshylar aýyldy oırandap, 160 adamdy urlap áketti

ASTANA. KAZINFORM - Nıgerııanyń ortalyǵyndaǵy Nıger shtatynda sodyrlardyń shabýylynan keminde 10 adam qaza taýyp, taǵy 160 adam urlanǵan, dep habarlady jergilikti bılik BBC-ge.

«Boko Haram» ıslamshyl tobynan bolýy múmkin qarýly sodyrlar juma kúni keshke Kýchı aýylyna kirdi, dep habarlady jergilikti keńes tóraǵasy Amıný Abdýlhamıd Najýme BBC World Service.

Onyń aıtýynsha, urlanǵandar arasynda negizinen áıelder men balalar, al qaza tapqandar arasynda aýdannyń qaýipsizdigin qamtamasyz etken jergilikti turǵyndar bar.

Málimetke qaraǵanda, sodyrlar aýylǵa mototsıklmen kirip, onda eki saǵattan astam ýaqyt ótkizip, osy ýaqyt ishinde ózderine tamaq ázirlep úlgergen.

Osydan keıin olar úı-úıdi tonap, jergilikti turǵyndardy alyp ketken.

Amnesty International quqyq qorǵaý uıymy jappaı urlaýǵa qatty alańdaıtynyn málimdedi.

«Sodyrlardyń aýylǵa basyp kirýi — Nıgerııa bıliginiń adamdardyń ómirin tolyqtaı qorǵaı almaǵanynyń taǵy bir dáleli, — delingen habarlamada. — 2021 jyldan beri sodyrlar Kýchı aýylyna únemi shabýyl jasap, áıelder men qyzdardy zorlap keledi».

Uıymnyń málimetinshe, sodyrlar turǵyndardan kóp mólsherde aqsha talap etedi.