Nıgerııada ekstremıster kolledj stýdentterine oq atty: 27 adam kóz jumdy
ASTANA. 4 qazan. QazAqparat - Nıgerııanyń soltústik-shyǵysyndaǵy Mýbı qalasynda belgisiz bireýler memlekettik polıtehnıkalyq kolledj stýdentterine oq atty. 27 adam kóz jumdy, 15 adam jaralandy. Bul týraly BNews.kz jazady.
BAQ-tyń habarlaýynsha, shabýyl jasaǵandar kampýstan tys jerde turatyn stýdentterdiń bólmelerine kirip oq atqan. Keıbir málimetter boıynsha, atys birneshe saǵatqa sozylǵan, degenmen ne polıtsııa, ne áskerı bólimshe qylmyskerlerge kedergi jasaı almaǵan.
Oqıǵa aldynda kampýs aýmaǵynda hat tabylǵan bolatyn, hatta stýdentterdi 2 qazan, seısenbi kúni qaýipsiz jerge kóshirip, sabaq ótkizbeýge shaqyrǵan.
Osy qylmysty Nıgerııa aýmaǵynda áreket etetin toptardyń biri de moıyndamady. Alaıda, polıtsııa shabýylǵa radıkaldy ıslamdyq baǵyttaǵy «Boko haram» tobynyń qatysy bar dep sanaıdy. Ekstremıster eldiń búkil aýmaǵynda ıslam memlektin qurý men qazirgi bilim berý modeline tyıym salýdy maqsat etken, dep habarlaıdy Newsru.com.
Bıylǵy jyly «Boko haram» 700 adamnyń ómirin qıǵandyǵyn moıyndap otyr. Al 2010 jyly olardyń qoldarynan 1,4 myń adam kóz jumdy.
