Nıgerııa prezıdenti urlanǵan 89 azamattyń bosatylǵanyn rastady

ASTANA. KAZINFORM — Nıgerııa prezıdenti Bola Tınýbý jeksenbi kúni ótken aptada eldiń ortalyq óńirinde urlanǵan 89 adamnyń bostandyqqa shyqqanyn resmı túrde rastady, dep habarlaıdy Sınhýa.

Onyń H áleýmettik jelisindegi málimdemesine sáıkes, bosatylǵandardyń qatarynda Kvara shtatyndaǵy Erýký eldi mekeninde shirkeý qyzmeti kezinde urlanǵan 38 dindar jáne juma kúni Nıger shtatyndaǵy mektepke jasalǵan shabýyl barysynda tutqynǵa alynǵan keminde 51 oqýshy bar.

Eske salsaq, buǵan deıin Agvara jergilikti basqarý aımaǵynda ornalasqan Áýlıe Marııa mektebiniń keminde 315 oqýshysy men muǵalimderin lańkester kepilge alǵan edi.

B.Tınýbýdyń aıtýynsha, urlanǵandardyń bostandyqqa shyǵýy qaýipsizdik kúshteriniń úılestirilgen áreketteriniń nátıjesinde múmkin boldy. Ol bul úderisti Iohannesbýrgte (Ońtústik Afrıka Respýblıkasy) ótýi tıis «Úlken jıyrmalyq» sammıtine josparlanǵan saparyn keıinge qaldyryp, jeke ózi baqylaǵan.

«Men sheginbeıtinimdi aıqyn aıtyp ótkim keledi. Árbir nıgerııalyqtyń, árbir shtatta, qaýipsiz ómir súrýge quqyǵy bar. Meniń basshylyǵymmen biz bul eldiń qaýipsizdigin qamtamasyz etip, halqymyzdy qorǵaımyz», – dep atap ótti ol.

Nıgerııa prezıdenti VIP-tulǵalardyń qaýipsizdigin qamtamasyz etip júrgen polıtsııa qyzmetkerlerine negizgi mindetterine kóbirek kóńil bólý jóninde tapsyrma berdi. Sebebi eldiń kóptegen aımaǵynda, ásirese shalǵaı óńirlerde polıtsııa qyzmetkerleriniń tapshylyǵy baıqalyp, bul halyqtyń qorǵalýyn qıyndatyp otyr.

Sondaı-aq ol eldegi qazirgi qaýipsizdik máselelerin eskere otyryp, barlyq ortada polıtsııanyń qatysýyn kúsheıtý qajet ekenin aıtty.

Aıta keteıik, buǵan deıin Nıgerııada qarýly adamdar 300-den astam balany urlap ketkenin jazdyq.
Bul elde osy aptada ekinshi ret balalardy jappaı urlaý oqıǵasy tirkeldi. Munyń aldynda sodyrlar 25 oqýshy qyzdy urlap, muǵalimin óltirip ketken edi.