Nıgerııa prezıdenti AQSh-ty din boıynsha dálelsiz qysym jasady dep aıyptady

ASTANA. KAZINFORM — Nıgerııa prezıdenti Bola Ahmed Tınýbý AQSh-tyń onyń elin «din bostandyǵy boıynsha erekshe alańdaýshylyq týdyratyn elder» tizimine engizý týraly sheshimin synǵa aldy, dep habarlaıdy Anadolý.

Amerıkalyq H áleýmettik jelisindegi paraqshasynda jarııalanǵan jazbasynda Tınýbý Nıgerııada din boıynsha kez kelgen qýdalaýǵa jol berilmeıtinin atap ótti.

«Nıgerııa — din bostandyǵyna konstıtýtsııalyq kepildik beretin demokratııalyq memleket. 2023 jyldan beri úkimetimiz hrıstıan jáne musylman qaýymdastyqtary basshylarymen ashyq ári konstrýktıvti dıalog júrgizip keledi, qaýipsizdik máselelerin dinge nemese aımaqqa bóle-jara qaramaı sheship otyr», — dedi ol AQSh prezıdenti Donald Tramptyń nıgerııalyq hrıstıandar «ómirlik qaýip jaǵdaıynda tur» degen málimdemesine túsinikteme retinde.

Tınýbý Aq úı basshysynyń baǵasyn «shyndyqqa janaspaıdy» dep atap, onyń bıliktiń barlyq azamat úshin dinı senim bostandyǵyn qorǵaý jolyndaǵy shynaıy kúsh-jigerin elemeı otyrǵanyn aıtty.

«Din bostandyǵy men tózimdilik — Nıgerııalyq ulttyq bolmystyń ajyramas bóligi. Biz dindik qysym kórsetýdiń kez kelgen túrin qabyldamaımyz jáne oǵan jol bermeımiz. El Konstıtýtsııasy barlyq konfessııalardyń quqyǵyn barynsha qorǵaıdy», — dedi prezıdent.

Memleket basshysy Nıgerııanyń dinı qaýymdastyqtardy qorǵaý máselesinde AQSh-pen jáne halyqaralyq qaýymdastyqpen ózara túsinistik pen seriktestikti nyǵaıtýǵa daıyn ekenin rastady.

Buǵan deıin, 31 qazanda, Donald Tramp Truth Social platformasyndaǵy jazbasynda Nıgerııany hrıstıandardy jappaı qyrý derekterine baılanysty «erekshe alańdaýshylyq týdyratyn el» dep jarııalaǵan. Al Pentagon Nıgerııadaǵy radıkaldarǵa qarsy shara daıyndap jatqanyn málimdegen edi.