Nıgerııa men Izraılde koronavırýs juqtyrǵandar tabyldy
LAGOS - TELЬ-AVIV. QazAqparat – Beısenbi kúni Nıgerııa Densaýlyq saqtaý federaldyq mınıstrligi Twitter-de elde Lagos shtatynda bir adamnyń koronavırýs juqtyrǵanyn málim etti, dep habarlaıdy QazAqparat CBS News-ke silteme jasap.
Vırýs Nıgerııada jumys isteıtin Italııa azamatynan tabylǵan. Ol 25 aqpanda Mılannan kelgen. Qazirgi ýaqytta naýqas Lagos aýrýhanasynda jatyr. Nıgerııa koronavırýs ınfektsııasy tabylǵan Afrıkadaǵy alǵashqy memleket.
Sondaı-aq, vırýs jeksenbi kúni Italııadan kelgen Izraıl azamatynan da tabyldy, dep jazady Jerusalem Post. Naýqastyń qyzýy kóterilip, karantınge jatqyzylǵan, dep habarlady eldiń densaýlyq saqtaý mınıstrligi. Bul adammen baılanysqandardyń barlyǵy úılerinde karantınde jatyr.
Er adam El Al áýe kompanııasynyń 382 reısimen Italııadan Izraılge jeksenbi kúni ushyp keldi.
Budan buryn Izraıl aýmaǵynda koronavırýs ınfektsııasy eki adamnan tabyldy. Olar Diamond Princess krýızdik laıneriniń jolaýshylary bolǵan.
Eldiń ishki ister mınıstri Are Derı beısenbi kúni koronavırýsqa baılanysty ıtalııalyq týrısterdiń Izraıl aýmaǵyna kirýine tyıym salatyn qujatqa qol qoıatynyn aıtqan edi. Beısenbi kúni Italııadan kelgen birneshe sheteldik týrıstke elge kirýge ruqsat etilmedi. Bergamodan ushyp kelgen 25 týrıst (sonyń ishinde 19 ıtalııalyq) ushaqtyń bortynda qaldy.
Sársenbi kúni densaýlyq saqtaý mınıstrligi Italııadan kelgen barlyq Izraıl azamattarynyń úılerinde 14 kún boıy karantınde bolýy tıis ekenin eskertti.
Eske salaıyq, Italııada vırýstan 17 adam kóz jumdy, aýrý juqtyrǵandar sany 650 adamǵa jetti.
