Nıgerııa azyq-túlik qaýipsizdigine tóngen qaterge baılanysty tótenshe jaǵdaı jarııalady

ABÝDJA. KAZINFORM — Nıgerııa prezıdenti sý jáne aýyl sharýashylyǵy salasynda ınnovatsııalyq strategııany qabyldaý qajettigin aıtty, dep jazdy Anadoly.

Afrıka qurlyǵyndaǵy halqy eń kóp memleket – Nıgerııada azyq-túlik qaýipsizdigine tóngen qaterge baılanysty «ulttyq tótenshe jaǵdaı» rejımi engizildi. Bul týraly el prezıdenti Bola Ahmed Tınýbýdyń Abýdjada ótken «Sýarý jáne drenaj jónindegi 6-shy Afrıka aımaqtyq konferentsııasynyń» ashylýynda oqylǵan joldaýynda aıtty. 

Óz úndeýinde Tınýbý eldegi azyq-túlik qaýipsizdigine tóngen qaýipke nazar aýdaryp, osyǵan baılanysty ulttyq deńgeıde tótenshe jaǵdaı jarııalanǵanyn málimdedi. Sondaı-aq, búkil el aýmaǵynda sýarý ınfraqurylymyn keńeıtip, sý resýrstaryn birige basqarýdyń mańyzdylyǵyn atap ótti.

Prezıdent konferentsııanyń «Afrıkadaǵy sýarý jáne sý resýrstaryn basqarý daǵdarysyn sheshý» degen uranmen ótip jatqanyn eske salyp, bul bastama aýyl sharýashylyǵyn turaqty damytýǵa jáne ekonomıkalyq tózimdilikti arttyrýǵa shaqyrý ekenin jetkizdi.

– Afrıka áli kúnge deıin sýarý salasyndaǵy áleýetin tolyq paıdalana almaı otyr. Bul saladaǵy basty kedergiler – ınfraqurylymnyń jetispeýshiligi, qarjylyq shekteýler, klımattyń ózgerýi jáne basqarý máseleleri, – dedi Tınýbý. 

Ol bul konferentsııanyń atalǵan túıtkilderge sheshim tabý jolynda mańyzdy múmkindik ekenin basa aıtty. Prezıdenttiń sózinshe, Nıgerııada sýarmaly eginshilik úshin zor áleýet bar.

– Bizdiń elimizde Nıger jáne Benýe ózenderiniń iri sý alaptarynda 3,1 mıllıon gektardan astam sýarmaly jerler bar, – dep atap ótti ol. 

Sondaı-aq Tınýbý eldegi sý resýrstary men aýyl sharýashylyǵy salasynda ınnovatsııalyq strategııalar ázirleý qajettigin málimdedi.

Eske sala keteıik, buǵan deıin Nıgerııada jyl basynan beri Lassa bezgeginen qaıtys bolǵandar sany 127-ge jetkenin jazǵan bolatynbyz.