Nıgerııa 17 mlrd. dollarlyq munaı men gazdyń urlanýyn tergeıdi
ASTANA. QazAqparat - Nıgerııalyq bılik buryny prezıdent Gýdlak Ebele Djonatannyń kezinde kompanııalar men túrli memlekettik mekemelerdiń munaı men otyndy deklaratsııalamaı jetkizý túrinde 17 mlrd dollardy qalaı urlaǵanyn tergeýdi qolǵa almaq, dep jazdy Forbes.
Nıgerııanyń qazirgi prezıdenti, OPEK múshesi Mohammadý Býharı sońǵy saılaýda Gýdlaktan 2,5 mln daýys artyq jınady. Ol 186 mln halqy bar eldegi sybaılas jemqorlyqpen kúresýge ýáde bergen. Býharı munaı sektorynan urlanǵan aqshany taýyp, kinálilermen ózi jeke aınalysatynyn aıtty. Budan basqa, prezıdent oǵan sybaılas jemqorlyqpen kúresýge kedergi keltiretinderge de jaza qatań bolatynyn eskertti. Býharı bılikke kelgen kezinde Nıgerııa qazynasynyń bos bolǵanyn da atap ótti.
Beısenbi kúni Ókilder palatasynyń múshesi Djonson Agbonaınma «munaı men suıytylǵan tabıǵı gazdy deklaratsııalamaı jetkizý túrinde 17 mlrd dollardan astam qarajatty urlaý faktisin tekserý» qajet ekenin habarlady. 20 kompanııa aralasqan sybaılas jemqorlyq týraly isti zerdeleıtin komıtet osy aptada qurylady.
Agbonaınmniń aıtýynsha, 2011-2014 jyldary munaı men otynnyń basym bóligi AQSh-qa, Qytaı men Norvegııaǵa jiberilgen. Ol sondaı-aq 58 mln barrel munaı, 727 tonna otyn joǵalǵanyn atap ótti.
