Nıgerdegi tóńkerisshiler ótpeli úkimettiń basshysyn taǵaıyndady
ASTANA. Aqpannyń 24-i. QazAqparat - Nıgerde tóńkeris jasap, bılikti basyp alǵan áskerıler ótpeli úkimettiń premer-mınıstri etip eldiń burynǵy baılanys mınıstri Mahamadý Dandany taǵaıyndady,
dep habarlaıdy VVS-diń Orys qyzmeti.
Nıger elinde aqpannyń 18-inde jasalǵan tóńkeris barysynda, áskerıler el prezıdenti Mamadý Tandjýdy, úkimet múshelerin tutqynǵa alyp, al memlekettik bılik organdaryn taratqan bolatyn.
Memlekettik tóńkeris jasap, eldiń qazirgi prezıdenti men úkimetin taǵynan taıdyrǵan áskerı tóńkerisshiler eldegi jaǵdaıdyń konstıtýtsııalyq tártipke qaıtyp oralatynyna jáne jańa konstıtýtsııa jasalatynyna kepildik bergenin QazAqparat budan buryn habarlaǵan bolatyn.
Derek kózderdiń aıtýynsha, mınıstrler keńesiniń jınalysynyń ústine áskerıler basyp kirgen, prezıdenttik saraıdy basyp alǵan jáne el prezıdenti Tandjýdy kepildikke alǵan. Eldegi saıası daǵdarys ótken jyldyń tamyz aıynan beri sozylyp keledi. Nıger Prezıdenti Mamadý Tandja prezıdenttik merzimi aıaqtalǵannan keıin de bılik basynda qalý múmkindigine ıe bolý úshin, oppozıtsııanyń narazylyǵyna qaramastan, Konstıtýtsııaǵa ózgertý engizgen edi. Tandja prezıdenttiktiń eki merziminen keıin jeltoqsan aıynda ókilettigin tapsyrýy kerek bolatyn, biraq ol saılaýsyz bılik basynda taǵy úsh jylǵa qalý múmkindigin taýyp otyr.
