Nıgerdegi áskerıler el prezıdentin bılikten ketirgenin málimdedi
Olar sondaı-aq konstıtýtsııa men barlyq memlekettik ınstıtýttar jumysy toqtatylyp, eldiń batys Afrıkadaǵy shekaralary jabylady dep habarlady. Teledıdardan general-polkovnık Amadý Abdýrahman sóıledi.
«Biz, qorǵanys jáne qaýipsizdik kúshteri ózderińiz biletin rejımdi taqtan taıdyrýǵa bel baıladyq», - dedi general teledıdar arqyly sóılegen sózinde. – Bul – qaýipsizdik salasyndaǵy jaǵdaı nasharlap, ekonomıkalyq jáne áleýmettik basqarýdyń tómendeýine baılanysty qabyldanǵan sheshim». Onyń aıtýynsha, mınıstrlik basshylary kúndelikti mindetin atqara beredi.
«Barlyq syrtqy seriktesterden máselege aralaspaýdy suraımyz. Jaǵdaı turaqtanǵansha teńiz jáne áýe shekaralary jabylady», – dedi ol.
Búlikshiler prezıdent saraıynda qamap ustaǵan Bazýmge AQSh Memlekettik hatshysy Entonı Blınken men BUU Bas hatshysy Antonıo Gýterrısh qońyraý shalyp, qoldaý kórsetken.
Ózderin Otan qorǵaý ulttyq keńesi dep ataǵan jańa áskerı hýnta elde jergilikti ýaqyt boıynsha saǵat 22:00-den 05:00-ge deıin komendanttyq saǵat engizdi.
2021 jyly demokratııalyq jolmen saılanǵan prezıdent Bazým Frantsııanyń odaqtasy dep sanalady. 1960 jyly Frantsııadan táýelsizdik alǵannan beri teńizge shyǵa almaıtyn Batys Afrıka memleketi Nıgerde tórt ret tóńkeris boldy, odan bólek bılik basyndaǵy úkimetti qulatýǵa baǵyttalǵan birneshe áreket sátsizdikke ushyrady.
