Nıgerdegi áskerı tóńkeris uıymdastyrýshylar eldegi jaǵdaıdyń konstıtýtsııalyq erejege oralatynyna «kepildik» berdi
ASTANA. Aqpannyń 22-si. QazAqparat - Ótken beısenbi kúni memlekettik tóńkeris jasap, eldiń qazirgi prezıdenti men úkimetin taǵynan taıdyrǵan áskerı tóńkerisshiler eldegi jaǵdaıdyń konstıtýtsııalyq tártipke qaıtyp oralatynyna jáne jańa konstıtýtsııa jasalatynyna kepildik berdi.
Bul týraly Batys Afrıka elderiniń ekonomıkalyq qoǵamdastyǵy komıssııasynyń (EKOVAS) tóraǵasy Mohammed ıbn Chamba jeksenbi kúni Nıger elordasy - Nıameı qalasynda málim etti, dep habarlaıdy ITAR-TASS agenttigi. Mohammed ıbn Chamba «jaǵdaıdy óz kózderimen kórý úshin» Nıameıge kelgen BUU emıssarlary men afrıkalyq uıymdardyń aralas delegatsııasynyń quramynda kelip otyr.
«Bz hýnta múshelerimen kezdesip, eldi tezirek konstıtýtsııalyq tártipke qaıtarýdyń joldaryn talqyladyq»,- deıdi Chamba myrza. Onyń aıtýynsha, tóńkerisshiler solaı etýge kepildik berip, «bul úderiske saıası partııalar men azamattyq qoǵamdardy keńinen tartýǵa ýáde berdi».
Nıgerde áskerıler el prezıdentin kepildikke alǵanyn QazAqparat budan buryn habarlaǵan bolatyn. Olar prezıdent pen birneshe mınıstrdi prezıdenttik saraıdan alyp shyǵyp, el astanasy Nıameı qalasynyń shetindegi kazarmalarǵa alyp ketken.
Derek kózderdiń aıtýynsha, mınıstrler keńesiniń jınalysynyń ústine áskerıler basyp kirgen, prezıdenttik saraıdy basyp alǵan jáne el prezıdenti Tandjýdy kepildikke alǵan. Eldegi saıası daǵdarys ótken jyldyń tamyz aıynan beri sozylyp keledi. Nıger Prezıdenti Mamadý Tandja prezıdenttik merzimi aıaqtalǵannan keıin de bılik basynda qalý múmkindigine ıe bolý úshin, oppozıtsııanyń narazylyǵyna qaramastan, Konstıtýtsııaǵa ózgertý engizgen edi. Tandja prezıdenttiktiń eki merziminen keıin jeltoqsan aıynda ókilettigin tapsyrýy kerek bolatyn, biraq ol saılaýsyz bılik basynda taǵy úsh jylǵa qalý múmkindigin taýyp otyr.
