Nıgerdegi tóńkeris: Frantsııa elden áskerin shyǵaryp jatyr
Keshe Frantsııanyń Bas shtaby Nıgerden áskerin shyǵarýdy bastaǵanyn málim etti. Frantsýz sarbazdary jergilikti kúzetpen birge birinshi kolonna quramynda bazasynan ketip jatyr. Kazinform bul týraly Euronews basylymyna silteme jasap habarlaıdy.
Frantsýz áskeriniń alǵashqy toby Nıgerden ketti, muny bılik basyna kelgen áskerı hýnta talap etti.
Qazirgi kúnge deıin jıhadshylarmen kúres aıasynda Nıgerde 1400 frantsýz sarbazy men ushqysh bolǵan. Olar eldiń soltústik-batysyndaǵy eki baza – Ýallam men Tabareı-Bareıge ornalastyrylǵan edi.
Olardyń elden ketýin shilde sońynda bılikti basyp alǵan Nıger generaldary talap etti. 24 qyrkúıekte Frantsııa prezıdenti Emmanýel Makron Parıj ben Nıameı arasyndaǵy áskerı seriktestik toqtaıtynyn, birtindep kontıngent shyǵarylatynyn málimdedi.
AFP-diń habarlaýynsha, seısenbi kúni túste Ýallamnan Nıameıge sarbazdar tizbegi, bronetehnıka men qural-jabdyq tıelgen júk kólikteri keldi.
Rejım ókilderi Nıameı áýejaıynda «úsh arnaıy reıs» tirkelgenin, onyń ekeýi «arnaıy maqsattaǵy bólimsheniń 97 sarbazyna», bireýi «materıaldyq-tehnıkalyq jabdyqtarǵa» arnalǵanyn málim etti.
Keıingi on jylda Nıgerge jıhadshylarmen kúresý úshin ulttyq áskermen birge 1400 frantsýz sarbazy men ushqysh jiberildi. Onyń myńǵa jýyǵy Nıameıde bolsa, tórt júzi eldiń batysyndaǵy «úsh shekara» aımaǵyna ornalasqan bolatyn.