Nıger kórshi eldermen shekarasyn ashty
ASTANA. QazAqparat – Nıger kórshiles bes elmen qurlyq jáne áýe shekarasyn ashty. Bul týraly France24 basylymy málimdedi, dep habarlaıdy QazAqparat «Armenpress» agenttigine silteme jasap.
Prezıdent Mohamed Bazým taqtan qulap, onyń kúzeti tóńkeris uıymdastyrǵannan keıin el shekarasy bir aptaǵa jabylǵan bolatyn.
«Aljır, Býrkına-Faso, Lıvııa, Malı jáne Chadomen qurlyq jáne áýe shekarasy búginnen bastap qaıta ashyldy», - dep málimdedi áskerı qyzmetkerlerdiń biri Nıger ulttyq telearnasynyń efırinde.
France24 habarlaýynsha, málimdeme Frantsııaǵa birinshi evakýatsııalyq reıs ushqannan keıin birneshe saǵattan soń jasaldy.
Frantsııanyń bas shtaby buǵan deıin Nıgerden 1 500 frantsýz áskerı qyzmetkerin qaıtarýdy josparlap otyrmaǵanyn málimdegen, al evakýatsııalaý operatsııasy tek beıbit turǵyndarǵa qatysty. Parıj Nıger astanasy Nıameıge Frantsııa men basqa da Eýropa elderiniń azamattaryn evakýatsııalaý úshin úsh ushaq jiberdi.
Sonymen qatar, Batys Afrıka memleketteri Ekonomıkalyq qaýymdastyǵynyń joǵary shendi áskerı qaıratkerleri 2-4 tamyz aralyǵynda Nıgerııa astanasy Abýdjada Nıgerdegi tóńkeristi talqylaıdy.
Eske salsaq, 26 shildede Nıger prezıdenti gvardııasy qyzmetkerleriniń bir bóligi memleket basshysy Mohamed Bazýmǵa qarsy shyǵyp, onyń bılikten shettetilgeni belgili boldy. Nıger áskeriniń qolbasshylyǵy prezıdentti taqtan taıdyrǵan sarbazdardy qolaıtyndyǵyn málimdedi.
Armııa generaly Abdýrahman Tchıanı eldiń jańa basshysy bolyp jarııalandy.
Frantsııa men birqatar batys elderi áskerı tóńkeristi aıyptady.
