Nıderlandy úkimeti COVID-19-dyń órshýine baılanysty kezekten tys otyrys ótkizedi

NUR-SULTAN. QazAqparat - Nıderlandy úkimeti koronavırýs ınfektsııasynyń órshýine qarsy kúres sharalaryn talqylaıdy, dep habarlaıdy QazAqparat tilshisi.

12 jeltoqsan kúni RIVM Qoǵamdyq densaýlyqty saqtaý ınstıtýty bir kúnde elde 9182 adamnan koronavırýs anyqtalǵanyn málimdedi. Bul 1 qarashadan bergi tirkelgen eń úlken kórsetkish. Premer-mınıstr Mark Rıýtte ótken aptada eger aýrý juqtyrý deńgeıi azaımasa, shekteý sharalary májbúrli túrde engiziletinin aıtqan bolatyn.

Kezekten tys otyrysqa densaýlyq saqtaý máselei boıynsha keńesshiler de shaqyrtylǵan.

Jergilikti BAQ-tyń habarlaýynsha, mýzeıler men zooparkterdiń jumysy toqtatylýy múmkin.

Bılik ókilderi Rojdestvo merekesi kezinde shekteý bosańsyp, odan jurt japa shege me dep alańdaýly. RIVM Qoǵamdyq densaýlyqty saqtaý ınstıtýtynyń sarapshylary aýrý juqtyrý deńgeıiniń ósip ketkenine «Jomart juma» aktsııasynyń áseri bar» dep boljam jasaýda. Sebebi sol kezderi Nıderlandy qalalarynyń ortalyq kóshelerinde jurt kóp shoǵyrlanǵan bolatyn.

Keı jerlerde shahar basshylary dúkenderge ýaqytynan buryn jabylýdy buıyrǵan. Sebebi arzan baǵamen satylyp jatqan taýarlardy alýǵa jınalǵan jurttyń qarasy kóbeıip ketken edi.