Nıderlandy men Frantsııada koronavırýs juqtyrǵandar sany ósti

BRıÝSSELЬ. QazAqparat – RIVM nıderlandtyq qoǵamdyq densaýlyq saqtaý ınstıtýtynyń málimeti boıynsha Nıderlandy koronavırýs juqtyrýdyń 3831 jańa jaǵdaıy tirkeldi, dep habarlaıdy QazAqparat tilshisi.

Nıderlandydaǵy kún saıynǵy statıstıka táýligine aýrýǵa shaldyǵý jaǵdaılarynyń sany 600-ge deıin artqanyn kórsetýde. Jergilikti aýrýhanadaǵy patsıentter sany 42-den 733-ke artqan. Onyń ishinde 160 adam ıntensıvti terapııa bóliminde em alýda. Nıderlandyda qaýipti vırýstan kóz jumǵandar sany toǵyzǵa kóbeıgen, ortasha eseppen alǵanda kúnine 14 ólim jaǵdaıy tirkeledi.

Nıderland premer-mınıstri Mark Rıýtte jańa shekteýler engizilgenge deıin aldaǵy birneshe kún ishinde koronavırýs juqtyrý jaǵdaılarynyń sany 5000-ǵa deıin bolýy múmkin ekenin málimdedi.

Vırýstyń aldyn-alý boıynsha jańa sharalar qatarynda kafe men barlardyń keshki 22:00-de jabylýy, toptasyp júrýdi shekteý jáne qoǵamdyq ǵımarattarda, sonyń ishinde dúkenderde, murajaılarda jáne memlekettik mekemelerde mindetti túrde maska taǵý bar. Koronavırýs juqtyrýdyń eń joǵary dınamıkasy iri megapolısAmsterdamda tirkelgen.

COVID-19 aýrýynyń ósý tendentsııasy Frantsııada da tirkeldi. Munda senbi kúni keshke 16 972 koronavırýsqa shaldyǵý jaǵdaıy anyqtaldy. Epıdemııa órshigen Parıj ben oǵan jaqyn mańdaǵy birneshe megapolıste «qyzyl aımaqqa» ený qaýpi bar.

Bul jaǵdaıda Frantsııa úkimeti kelesi aptada qoǵamdyq tamaqtaný jáne demalý oryndarynyń jumysyna jańa shekteýler engizýge daıyn ekenin málimdedi.