Nıderlandy quramasy bapkerin aýystyrmaq
ASTANA. QazAqparat - Fýtboldan 2016 jylǵy Eýropa chempıonatyna irikteý kezeńi aıasynda Qazaqstan quramasymen bir topta baq synaıtyn Nıderlandy quramasynyń basshylyǵy bas bapker Gýs Hıddınkti qyzmetinen bosatýy múmkin, dep jazady massaget.kz.
Qyzǵaldaqty eldiń ókilderi irikteý kezeńin sátsiz bastady. Sońyna deıin qarsylasqan Qazaqstan quramasynan úsh upaıdy enshilegenmen, chehtar men ıslandııalyq fýtbolshylarǵa úsh upaı syılady. Bul nátıje atalǵan eldiń fýtbol federatsııasy men jankúıerlerin qanaǵattandyryp otyrǵan joq. Aǵylshyndyq Daily Mirror basylymy aqparaty boıynsha, Gýs Hıddınktiń ornyn basar jańa bapker anyqtalyp ta qoıǵan kórinedi. Bul orynǵa qazirgi tańda «Saýtgempton» komandasyn jattyqtyryp júrgen Ronald Kýman basty úmitker sanalýda.
Aıta keteıik, qazirgi tańda Nıderlandy quramasy úsh kezdesý qorytyndysynda «A» tobynda úshinshi orynda keledi. Al bul toptaǵy jerlesterimiz bir upaımen besinshi orynda tur.
