Nıderlandy halqy Uly dala áýenine qanyqty
Qazaqstan dıplomattarynyń shaqyrýymen Gaagadaǵy áıgili Dılıdjentıa teatrynda «Ze Medjık ov Noýmadz» tobynyń kontserti jáne Qazaqstannyń osy memlekettegi elshiliginiń saltanatty qabyldaýy ótti. Kontserttik qoıylym aldynda elimizdiń Nıderlandydaǵy elshisi Maǵjan Іlııasov qonaqtarǵa Prezıdent Nursultan Nazarbaevtyń «Uly dalanyń jeti qyry» atty maqalasynyń negizgi tezısterin jetkizdi.
Osydan keıin kórermender dombyra, sybyzǵy, shańqobyz ben sazsyrnaıdan tógilgen kúı men án arqyly ulanǵaıyr dalanyń únin estip, kóshpendilerdiń tarıhymen jáne mádenıetimen tanysty. Ulttyq mýzykanyń djazben úndesýi qonaqtardy tánti etti.
«Kontsertte djaz da boldy. Biraq men mundaıdy Gollandııada estigen emespin. Ásirese maǵan ónerpazdar tobynyń ánshisi unady. Onyń oınaǵan aspabynyń úni qandaı ǵajap. Kontsert óte unady», - deıdi jergilikti kórermen Aleksandr Belarts van Blokland.
«Uly dalanyń jeti qyry» atty maqalada Elbasy qazaq mádenıetiniń, dili men tanymynyń tamyry tereń ekenin atap ótti. Mine, búgin batys kórermenderi kóshpendilerdiń mýzykasy men mádenıetin estip, sony sezindi», - dep atap ótti Qazaqstannyń Nıderlandydaǵy Tótenshe jáne ókiletti elshisi Maǵjan Іlııasov.
