Nıderlandy ǵalymdary áýejaıdy qorǵaıtyn robot qustar oılap tapty
ASTANA. QazAqparat - Nıderlandy ǵalymdary jergilikti áýejaılardy toptasqan shaǵalalar men úırekterden qorǵaıtyn robot qustardyń jobasyn oılap tapty, dep habarlaıdy NL Times.
Osy eldegi Tvente qalasy ýnıversıtetiniń qyzmetkerleri arnaıy ıtelgiler men búrkitterdiń jobasyn jasady. Olardyń mindeti áýejaı aýmaǵynda qaptaı ushatyn qustardy úrkitý bolmaq. Aıta keter bolsaq, Nıderlandyda kóp jyldan beri kólik jelilerine jaqyn mańǵa toptasa uıa salatyn qustar, ásirese ushaqtardyń ushyp-qonýyna kedergi keltirýde.
Ýnıversıtet ǵalymdarynyń paıymdaýynsha, robot qustar bul problemany sheshetin bolady. Olar jyrtqysh qustardyń daýsyn aınytpaı salady. «Bizdiń qurastyrǵan ıtelgiler men búrkitterge uqsas robottarymyz bul jerde ózderiniń qojaıyn ekendikterin bildirip shaǵalalar men úırekterdiń sońyna túsip qýatyn bolady»,-deıdi joba avtorlary.
Temir qanatty jyrtqyshtar Tventedegi únemi shaǵalalar jınalatyn qoqys tastalatyn jerde synaqtan sátti ótti. Robottar osy aýmaqta kúzetke shyqqannan soń olardyń qatary kúrt azaıǵan. Injenerler 2015 jyldan bastap elektrondy ıtelgi men búrkit robottardy fermalar men áýejaılarda paıdalana bastaýdy josparlap otyr.
