Nıderlandy deni saý adamdarǵa óz ómirlerin úzýdi zańdastyryp bermek
ASTANA. QazAqparat - Nıderlandy Úkimeti aıyqpas syrqatqa shaldyqqandarǵa ǵana emes, «ómirleri aıaqtalǵanyn» túsingen barlyq deni saý adamdarǵa evtanazııa jasaýǵa ruqsat berýdi kózdeıtin zań jobasyn ázirleý ústinde.
13 qazan kúni Reuters agenttigi habarlaǵandaı, mundaı bastama densaýlyq saqtaý mınıstri Edıt Shıppers pen qaýipsizdik jáne ádilettilik mınıstri Arta van der Steranyń hatynda aıtylǵan.
Qujat avtorlarynyń paıymynsha, «qatań jáne naqty krıterıılerdi alǵa tartqannan keıin, dúnıedegi tirshiligin aıaqtaý týraly saralanǵan sheshimge kelgenderge ózderi qalaǵan ádispen ómirlerimen qosh aıtysýǵa ruqsat berilýi tıis». Zań jobasyn dárigerlermen jáne ádep jónindegi mamandarmen birlese 2017 jyldyń sońyna deıin jiti pysyqtaý kózdelýde.
Reuters-tiń atap ótýinshe, evtanazııa Gollandııada jıi qoldanylady. Máselen, 2015 jyly 5516 adam óz erikterimen ómirlerin úzgen. Bul atalmysh eldegi barlyq ólim-jitimniń 3,9 paıyzyn quraıdy.
