Nıderlandtaǵy týrnırde qazaqstandyq eki boksshy jarysty jalǵastyrady

ASTANA. KAZINFORM — Nıderlandtyń Eındhoven qalasynda ótip jatqan Eindhoven Cup halyqaralyq týrnırinde qazaqstandyq eki boksshy alǵashqy jekpe-jeginde jeńiske jetti.

El quramasynan Abylaıhan Júsipov (70 keli) birinshi kezdesýinde lıtvalyq AleksandraTrofımovpen qolǵap túıistirdi. Jekpe-jek barysynda tóreshiler onyń jeńisine biraýyzdan qoldaý bildirdi.

Abylaıhan Júsipov — ulttyq quramanyń kóshbasshy bylǵary qolǵap sheberiniń biri. Ol úsh álem chempıonatynda (Gambýrg-2017, Ekaterınbýrg-2019, Belgrad-2021) qola júlde alsa, 2017 jyly Tashkentte Azııa chempıonatynyń qola júldegeri atandy.

Sondaı-aq Sabyrjan Aqqalyqov (75 keli) alǵashqy jekpe-jegin sátti ótkizdi. Ol ýelstik Orlando Holleı-Satomıdi 5:0 esebimen tize búktirdi.

Sabyrjan 2021 jyly jastar arasynda álem chempıony atansa, 2024 jyly Azııa chempıonatynda jeńis tuǵyryna kóterildi. 

Al el quramasynan Erhan Turdan (60 keli) 1/8 fınaldan asa alǵan joq.

Aıta ketsek, el quramasynda olardan basqa Danııal Sábıt (50 keli), Mahmud Sabyrhan (55 keli), Ertýǵan Zeınýllın (65 keli), Erasyl Jaqpekov (80 keli), Dáýlet Tilemisov (85 keli), Saǵyndyq Toǵambaı (90 keli), Nurlan Saparbaı (90 keliden joǵary) bar.

Halyqaralyq týrnır 6-9 maýsym aralyǵynda ótedi.