Nıderlandtaǵy murajaıda jarylystan keıin kóne altyn dýlyǵa urlandy

ASTANA. KAZINFORM – Drentse murajaıynan urlanǵan basty artefakt Rýmynııanyń Ulttyq tarıh murajaıynan nesıege alynǵan Kotsofeneshtı altyn dýlyǵasy boldy, dep habarlaıdy euronews.com.

Urylar Assen qalasyndaǵy Drentse murajaıyna kirý úshin jarylys uıymdastyryp, bul olarǵa «Dakııa – altyn men kúmis patshalyǵy» dep atalatyn iri kórmeden birneshe artefaktilerdi urlaýǵa múmkindik berdi.

Polıtsııanyń málimetinshe, senbi kúni tańerteń murajaıda kúshti jarylys bolyp, esikter men terezeler ushyp, jaqyn mańdaǵy ǵımarattarǵa zaqym kelgen.

Bizdiń dáýirimizge deıin 450 jylǵa jatqyzylatyn Kotsofeneshtıdiń altyn dýlyǵasy frakııalyq-gettik zergerlik ónerdiń shedevri sanalady. Ol demalys kúnderi jabylǵan kórmeniń basty eksponattarynyń biri boldy.

Kórmege sonymen qatar Rýmynııanyń 15 murajaıynan alynǵan 600-den astam altyn jáne kúmis zattar qoıyldy. Dakııa ımperııasy qazirgi Rýmynııa aýmaǵynda boldy, eldiń ulttyq murajaıy qazir óziniń negizgi eksponattarynan aıyryldy.

- Bul Assendegi Drentse murajaıy men Býharesttegi Rýmynııanyń Ulttyq tarıh murajaıy úshin aýyr kún. Murajaı ashylǵaly 170 jyl ishinde mundaı iri oqıǵa buryn-sońdy bolmaǵan. Bul Rýmynııadaǵy áriptesterimizdi de qatty qynjyltady, - dedi Drentse murajaıynyń bas dırektory Garrı Týpan.

Tergeý amaldaryna kórshi elderdiń quqyq qorǵaý organdary, sondaı-aq Interpol jumyldyryldy.

Osyǵan deıin Greenpeace uıymynyń Nıderlandqa qarsy sotta jeńiske jetkeni týral jazǵan edik.