Nıderlandtaǵy kúmis mýzeıden 300-den astam eksponat qoldy boldy

ASTANA. KAZINFORM — Nıderlandtyń Gelderland provıntsııasyna qarasty Dýsbýrg qalasyndaǵy Úlken shirkeý ǵımaratynda ornalasqan kúmis mýzeıinen 300-den astam eksponat urlanǵan. Bul týraly Omroep Gelderland habar taratý korporatsııasy málimdedi, dep jazdy Belta agenttigi.

Taratýshy kompanııanyń dereginshe, keltirilgen shyǵyn birneshe ondaǵan myń eýroǵa baǵalanyp otyr.

Qaraqshylyq 21 qańtarǵa qaraǵan túni bolǵan. Belgisiz adamdar mýzeı ǵımaratyna eki esikti buzyp kirgen.

— Olar eki esikti de buzyp, birden kórme zalyna bet alǵan, — dedi mýzeı basqarmasynyń tóraǵasy Ernst Býsveld.

Ekspozıtsııa beınebaqylaý jáne dabyl júıesimen jabdyqtalǵan jeke zalda ornalasqan. Alaıda qaskóıler dabyl júıesin isten shyǵaryp, ishke kirgen boıda kameralardy talqandaǵan.

Mýzeı basshylyǵynyń aıtýynsha, barlyq kúmis buıymdar urlanǵan. Qylmyskerler 14 vıtrınany syndyryp, ishindegi zattardyń barlyǵyn alyp ketken.

— Bul tek materıaldyq shyǵyn emes, bul — tarıh pen mádenı muranyń joǵalýy, — dep atap ótti mýzeı ókilderi.

Oqıǵadan keıin mýzeı ýaqytsha jabyldy.

— Qazir bizde ýaqytsha kórmede turǵan birneshe keramıkalyq eksponat qana qaldy. Bolǵany osy, — dedi Ernst Býsveld. 

Mýzeı qyzmetkerleri urlanǵan zattardy qaıtarý is júzinde múmkin emes dep sanaıdy. Sońǵy bes jylda kúmistiń baǵasy eki esege jýyq ósken, sondyqtan biregeı, balamasy joq tarıhı buıymdar balqytylyp jiberilýi múmkin degen qaýip bar.

— Kúmisti ońaı eritip jiberýge bolady, onyń qaıdan shyqqanyn eshkim bilmeıdi. Al sýretpen jaǵdaı múlde bólek, — dedi mýzeı basshysy.

Atalǵan derek boıynsha tergeý amaldary júrgizilýde. Quqyq qorǵaý organdary kýágerlerdi kez kelgen aqparatty habarlaýǵa shaqyrdy.

Kúmis mýzeıi Dýsbýrg qalasynda 2021 jyly ashylǵan. Ol taza kúmisten jasalǵan turmystyq buıymdar men as quraldarynan turatyn biregeı taqyryptyq kollektsııasymen tanymal bolǵan. Urlanǵan eksponattar XVIII–XX ǵasyrlarǵa jatatyn, álemniń 25-ten astam elinen jınalǵan jeke kollektsııa negizinde mýzeıge qoıylǵan buıymdar edi.

Aıta keteıik, buǵan deıin Shveıtsarııa mýzeıinen ejelgi altyn monetalar kollektsııasy urlanǵanyn jazǵan edik.