Nıderlandta koroldiń otbasy múshelerine qastandyq jasamaq boldy degen kúdikpen er adam ustaldy
ASTANA. KAZINFORM - Nıderlandtyń quqyq qorǵaý organdary koroldiń otbasy múshelerine — hanshaıymdar Katarına-Amalııa men Aleksııaǵa qastandyq jasamaq boldy degen kúdikpen 33 jastaǵy er adamdy ustady, dep habarlaıdy Kazinform-nyń Eýropalyq odaqtaǵy menshikti tilshisi.
Jergilikti buqaralyq aqparat quraldarynyń málimetinshe, tergeý materıaldary men prokýratýra derekterine sáıkes, kúdikti bıyl aqpan aıynda Gaaga qalasynda korol Vıllem-Aleksandrdiń qyzdaryna shabýyl jasaýdy josparlaǵan.
Tintý barysynda kúdiktiden zorlyq-zombylyq áreketterine daıyndalǵanyn rastaıtyn aıǵaq zattar tárkilendi. Atap aıtqanda, hanshaıymdardyń esimderi oıyp jazylǵan eki balta jáne ekstremıstik urandar tabylǵan.
Sondaı-aq koroldiń otbasy músheleriniń esimderi kórsetilgen jáne «Bloedbad» («qandy qyrǵyn») degen sóz jazylǵan jazba anyqtaldy.
Nıderlandta taq muragerine qatysty mundaı jaǵdaı alǵash ret bolyp otyrǵan joq.
Buǵan deıin hanshaıym Katarına-Amalııa uıymdasqan qylmystyq toptar tarapynan tóngen qaýipke baılanysty Amsterdam qalasyndaǵy stýdenttik jataqhanadan korol saraıyna qaıta kóship, kúzet kúsheıtilgen edi.
Іs boıynsha aldyn ala tyńdaý 4 mamyr, dúısenbi kúni Gaaga sotynda ótpek. Aıta keteıik, bul kún Nıderlandtaǵy Ulttyq eske alý kúnimen tuspa-tus keledi.
Korol úıiniń resmı ókilderi men el úkimeti ázirge egjeı-tegjeıli túsinikteme bermeı otyr. Olar koroldiń otbasy músheleriniń qaýipsizdigi arnaıy qyzmetterdiń baqylaýynda ekenin atap ótti.
27 sáýirde Memleket basshysy Nıderland korolin ulttyq merekemen quttyqtady. Qasym-Jomart Toqaev Vıllem-Aleksandrge aldaǵy qyzmetinde tabys tilep, korol otbasy men Nıderlandy halqyna amandyq pen baq-bereke tiledi.
