Nıderlandta kórnekti qazaq qaıratkerleriniń murasy talqylandy

BRıÝSSELЬ. QazAqparat – Qazaqstannyń Nıderlandtaǵy Elshiligi Qazaq House Nıderland qorymen birlesip, kórnekti qazaq qaıratkerleriniń mereıtoılaryn merekeleýge arnalǵan onlaın konferentsııa uıymdastyrdy, dep habarlaıdy QazAqparat tilshisi.

Batys jurtyna «Rýhanı jańǵyrý» aıasynda Jambyl Jabaev (175 jas), Muqaǵalı Maqataev (90 jas), Álıhan Bókeıhanov (155 jas), Ybyraı Altynsarın (180 jas), Dına Nurpeıisova (160 jas) jáne Latıf Hamıdı (115 jas) sııaqty kórnekti qaıratkerlerdiń ómir joly men mádenı murasy tanystyryldy.

Qazaqstannyń Nıderlandtaǵy Elshisi Asqar Jumaǵalıev jınalǵan qaýym aldynda qazaqtyń uly aqyndary men saıasatkerleriniń, mýzykanttary men pedagogtarynyń shyǵarmashylyǵy, qazaqty órkenıet kóshine qosýdaǵy sol zamandardaǵy zııaly qaýymnyń róli týraly keńinen áńgimeledi.

«Eń aldymen, vebınarymyzǵa qashyqtan qosylǵan professor Zıfa Áýezovaǵa qazaqtyń uly qaıratkerleri týraly ǵylymı maǵlumat bergeni úshin alǵys bildirgim keledi. Professor Zıfa Áýezova qazaqtyń uly fılosofy Abaı men atasy Muhtar Áýezovtiń jolyn jalǵap kele jatyr. Osy sharanyń joǵary deńgeıde ótýine qoldaý bildirgen Qazaq House uıymyna jáne onyń basshysy Dına Mahmutovaǵa rahmet aıtamyn. Qazaqstannyń Tuńǵysh Prezıdenti Nursultan Nazarbaev pen Prezıdent Qasym-Jomart Toqaev jastar arasynda bilimge degen umtylys, patrıotızm, eńbeksúıgishtik, yntymaqtastyq jáne jaýapkershilik sııaqty qasıetterdi nasıhattaý qajettigine árdaıym nazar aýdarady. Biz bul qasıetterdi ómirleri búgingi keshke arqaý bolǵan adamdardyń eńbek jolynan taba alamyz», - dedi Asqar Jumaǵalıev.

Osydan keıin qazaq aǵartýshylary men ǵalymdarynyń qyzmeti týraly qyzyqty aqparat usynyp, tuşymdy baıandama jasaǵan Zıfa-Alýa Muratqyzy Áýezova sóz aldy. Sharaǵa Qazaqstandyq stýdentter, Nıderland elinde turatyn otandastar , sondaı-aq dıplomattar men jergilikti ǵalymdar, isker top ókilderi qatysty.