Nıderlandta Qazaqstannyń ınvestıtsııalyq áleýeti usynyldy

Nıderlandtaǵy Qazaqstannyń Elshisi Maǵjan Іlııasov is-shara qatysýshylaryna Prezıdent Nursultan Nazarbaevtyń Qazaqstan halqyna «Qazaqstannyń úshinshi jańǵyrýy: jahandyq básekege qabilettilik» Joldaýynyń mátini týraly habardar etti, sonymen qatar Qazaqstannyń ınvestıtsııalyq áleýetine mýltımedııalyq sholý jasap, Nıderlandpen iskerlik yntymaqtastyq múmkindikterin kórsetti.

Dıplomat gollandtyq bıznesmenderdi 2017 j. maýsym aıynda «EKSPO-2017» kórmesinde Nıderland kúni sheńberinde ótkizilýi josparlanyp otyrǵan Qazaqstan-Nıderland Іskerlik keńesiniń úshinshi otyrysyna qatysýǵa shaqyrdy. Astanada ótetin kórmege qatysý balamaly energetıka jáne energııa únemdeý, sý resýrstaryn basqarý, logıstıka jáne telekommýnıkatsııalyq tehnologııalar salasyndaǵy qarym-qatynastardy damytýǵa serpin beredi, dep atap ótti elshi.

«Kazakh Invest» AQ-nyń Eýropalyq odaqtaǵy óńirlik dırektory Ashat Beısenbaev aıtqan sózi Qazaqstanda bıznes júrgizý jaǵdaılarymen, quqyqtyq kepildikterdi qurý boıynsha Úkimet sharalarymen, sheteldik ınvestorlarǵa arnalǵan jeńildiktermen tanystyrýǵa jáne shetel kapıtalynyń qatysýymen kásiporyndardyń belsendiligin yntalandyrýǵa, sondaı-aq Qazaqstannyń otyn-energetıkalyq sektoryn damytýǵa baǵyttaldy.
 

Energetıka, aýyl sharýashylyq, kólik, hımııa ónerkásibi, ǵylym jáne tehnologııa salasyndaǵy yntymaqtastyq múmkindikterin ataı otyryp, A. Beısenbaev golland kompanııalaryn Qazaqstannyń ınfraqurylymyna jáne ındýstrııalyq-ınnovatsııalyq damý jobalaryna belsendi qatysýǵa shaqyrdy.

Tusaýkeser qorytyndysy boıynsha aǵymdaǵy jyldyń sońyna deıin Qazaqstanǵa gollandtyq iskerlik delegatsııasynyń saparyn uıymdastyrý týraly ýaǵdalastyqqa qol jetkizildi. QR Elshiligi men «Kazakh Invest» agenttigi qazaqstandyq ekonomıkaǵa gollandtyq ınvestıtsııalardy tartý maqsatymen belsendi ózara árekettestigin jalǵastyrýǵa nıet bildirdi.