Nıderlandta ereýilge shyqqandar eldiń negizgi tasjoldarynyń birin jaýyp tastamaq boldy

BRıÝSSELЬ. QazAqparat – Senbi kúni Nıderland polıtsııasy Gaaga qalasyndaǵy aktsııaǵa qatysqan júzdegen adamdy ustady, dep habarlaıdy QazAqparattyń menshikti tilshisi.

Klımattyń ózgerýimen kúres belsendileriniń kóbi senbi kúni A12 tas jolynyń eki jaǵyn da jaýyp tastamaq bolǵannan keıin tutqyndaldy. Belsendiler munaı men gaz sııaqty qazba otyndaryna bóletin úkimettiń sýbsıdııalaryna narazylyq bildirdi.

Extinction Rebellion belsendileri polıtsııanyń eskertýine qaramastan, tas jolǵa shyqqan. Narazy top mınıstrlikter ǵımaratynyń mańyndaǵy qala ishindegi joldy jappaq boldy.

Ereýilge qatysýshylardyń biri ustaǵan bannerde «Salyq tóleýshilerdiń 17,5 mlrd eýro qarjysy qazba otynǵa ketetini» jazylǵan. «Bul – tyǵyryq» delingen klımattyń ózgerýimen kúres belsendileriniń taǵy bir plakatynda.

Ereýilshilerdiń keıbiri ózderin shynjyrmen kisendep qoıǵan. Polıtsııa belsendilerdi taratý úshin arnaıy quraldardy paıdalandy.

Polıtsııa 12:45 shamasynda olardy taratýǵa kirisip, aımaqty bosatpasa tutqyndalatyndaryn eskertti. Saǵat 14:00-ge qaraı ondaǵan adam ustalyp, avtobýsqa otyrǵyzyldy.

Basqa ondaǵan saıası top ókilderi de narazylyq sharasyna qatysyp, osy arqyly Nıderlandta ereýilge qatysý quqy shekteletinine qarsylyq tanytqysy kelgenin jetkizdi.

Jol kúndizgi 4-ter shamasynda tazartyldy. Osy ýaqytta polıtsııa baǵandarǵa shyǵyp alǵan sońǵy belsendilerdi ustap áketti.

Keshke qaraı polıtsııa 200 adamnyń qamaýǵa alynǵanyn habarlady. Biraq narazylyq sharasyn uıymdastyrǵan Extinction Rebellion uıymy 500-ge jýyq adamnyń ustalǵanyn aıtty.