Nıderlandta Batys Nil vırýsyn juqtyrǵan 28 adam anyqtaldy
ASTANA. KAZINFORM — Nıderlandta Batys Nil vırýsyn 28 adam juqtyrǵan. Olardyń tórteýi kóz jumǵan. Bul týraly BELTA Nıderlandtyń Qoǵamdyq densaýlyq saqtaý jáne qorshaǵan orta ulttyq ınstıtýtynyń (RIVM) derekterine silteme jasap habarlady.
Qazirgi tańda ınfektsııa juqtyrǵandardyń barlyǵy aýrýhanada jatyr. Kóp jaǵdaıda dıagnoz naýqastar aýrýhanaǵa aýrý belgilerimen túskennen keıin rastalǵan.
Qaıtys bolǵandardyń birine vırýs qan quıý kezinde juqqan. Dárigerlerdiń málimetinshe, donor qan tapsyrǵannan keıin bir aptadan soń aýrý belgilerin kórsetken. Ol buǵan deıin shetelge shyqpaǵan. Osyǵan baılanysty mamandar ınfektsııanyń Nıderland aýmaǵynda juqqan degen qorytyndyǵa kelgen.
Tamyz aıynan beri eldiń ártúrli aımaqtarynda Batys Nil vırýsynyń taralyp jatqanyna dálelder anyqtaldy.
Infektsııa juqtyrǵan adamdardyń basym kópshiliginde — shamamen 80%-ynda — eshqandaı aýrý belgileri baıqalmaıdy. Taǵy 19%-ynda dene qyzýynyń kóterilýi, bas aýrýy jáne bulshyqet aýyrýy sııaqty tumaýǵa uqsas jeńil belgiler paıda bolady. Al shamamen 1%-ynda aýrý aýyr ótip, ómirge qaýip tóndiretin asqynýlarǵa ákelýi múmkin.
Nıderland aýmaǵynda adamdardyń Batys Nil vırýsyn jergilikti jerde juqtyrý jaǵdaılary sońǵy ret 2020 jyly tirkelgen. Sol kezde ınfektsııa 10-nan az adamnan anyqtalǵan.
Buǵan deıin Anadoly agenttigi Grekııanyń Attıka aımaǵyndaǵy 33 mýnıtsıpalıtette, sondaı-aq Fessalııa, Ortalyq Makedonııa, Mramor teńizi mańy, Ortalyq Grekııa jáne Krıt óńirlerinde Batys Nil vırýsy anyqtalǵanyn habarlaǵan.
2018 jyly Grekııada Batys Nil vırýsyn juqtyrǵan 317 adam tirkelip, olardyń 51-i qaıtys bolǵan. Bıylǵy jyly aýrý juqtyrǵandar sany budan da kóp bolýy múmkin.
Batys Nil vırýsy degen ne?
Batys Nil qyzbasy — jedel vırýstyq zoonozdyq aýrý. Ol adamǵa negizinen vırýsty juqtyrǵan masalardyń shaǵýy arqyly beriledi. Keneler de vırýsty tasymaldaýshylardyń qataryna jatady.
Vırýs adamnan adamǵa tikeleı berilmeıdi.
Batys Nil vırýsynyń tabıǵı oshaqtary Afrıka, Amerıka, Eýropa jáne Azııanyń 90-nan astam elinde kezdesedi.
Buǵan deıin Ebola indeti Kongonyń jeti provıntsııasyna taraǵanyn jazdyq.
