Nıderlandta áıelderdi arnaıy jasaqqa qabyldaý bastalady

ASTANA. KAZINFORM — Nıderlandtyń 8 áskerı qyzmetshi áıeli qurlyq jáne teńiz kúshteriniń arnaıy jasaqtaryna irikteýden ótýge daıyndyqty bastady, dep habarlaıdy BelTA.

Nıderlandta áıelderdi arnaıy jasaqqa qabyldaý bastalady
Foto: Pexels

Eldiń qorǵanys mınıstriniń memlekettik hatshysy Derk Bosveıktiń aıtýynsha, olardyń úlgisi qarýly kúshter qataryna kóbirek áıel tartýǵa yqpal etedi dep josparlanǵan. 

— Qarýly kúshter qatarynda áıelder sanynyń artýy biz úshin óte mańyzdy. Áıelderdiń kez kelgen deńgeıde erlermen teń dárejede qyzmet ete alatynyn kórsetkimiz keledi, — dedi Bosveık NRC gazetine bergen suhbatynda.

Basylymnyń málimetinshe, 1 qyrkúıektegi jaǵdaı boıynsha Nıderland qarýly kúshterindegi 46,9 myń áskerı qyzmetshiniń 6,2 myńnan astamy áıelder bolǵan. Bul jalpy quramnyń shamamen 13 paıyzyna teń. Sońǵy birneshe jylda bul kórsetkish ózgermegen. Bosveık 2030 jylǵa qaraı áıelderdiń úlesin keminde 30 paıyzǵa jetkizýdi kózdep otyr.

Memlekettik hatshynyń aıtýynsha, erler men áıelderge qoıylatyn normatıvter birdeı bolady. Áıel úmitkerlerge jeke jattyǵý baǵdarlamalary ázirlenip, arnaıy jabdyqtar beriledi. Sonymen qatar ol Nıderland armııasynda áıelder áli kúnge deıin erlerge arnalǵan áskerı jabdyqtardy paıdalanýǵa májbúr ekenin moıyndady.

Bosveıktiń bul málimdemesi eldiń áskerı áleýetin arttyrý sharalary qolǵa alynǵan tusta jasalǵan. 15 qyrkúıekte usynylǵan bıýdjet jobasyna sáıkes, 2027 jyly qorǵanys salasyna 28,9 mlrd eýro bólý josparlanǵan.

Al 2030 jylǵa qaraı qorǵanys mınıstrligi áskerı qyzmetshilerdi, rezervtegiler men azamattyq personaldy qosa alǵanda, qyzmetkerler sanyn 100 myńnan asyrýdy kózdep otyr.

Aıta keteıik, Qazaqstannyń Ulttyq ulanyna qarasty «Búrkit» arnaıy jasaǵynyń tarıhynda alǵash ret áıel áskerı qyzmetshi sapqa qosyldy. «Kıtana» laqap atymen tanylǵan Qymbat — halyqaralyq jarystardyń jeńimpazy, endigi maqsaty — kúreń beret alý.