Nıderlandta avtokólik rojdestvolyq sherý kórermenderin qaǵyp ketti
ASTANA. KAZINFORM — Nıderlandtyń Nıýnspet qalasynda bolǵan jol-kólik oqıǵasy saldarynan keminde toǵyz adam zardap shekti, kólik tizgininde jergilikti turǵyn áıel bolǵan. Al Germanııanyń batysyndaǵy Gısen qalasynda Ázerbaıjan azamaty avtobýs aıaldamasyna kólikpen soǵylǵan. Bul týraly Euronews habarlady.
Dúısenbi kúni keshke Nıderlandtyń shyǵys bóliginde avtokólik rojdestvolyq shamdarmen bezendirilgen aýyl sharýashylyǵy tehnıkasynyń sherýi bastalýyn jol jıeginde kútip turǵan kórermender tobyna soǵyldy.
Oqıǵa Amsterdamnan shamamen 80 shaqyrym shyǵysta ornalasqan Nıýnspet qalasynda boldy.
Kóliktiń qaǵýy saldarynan toǵyz adam jaraqat aldy, olardyń keminde úsheýiniń jaǵdaıy aýyr dep baǵalanyp otyr. Jedel járdemniń birneshe brıgadasy men sanıtarlyq tikushaqtar zardap shekkenderdi aýrýhanalarǵa jetkizdi. Sherý toqtatyldy.
Polıtsııanyń málimetinshe, avtokólikti 56 jastaǵy jergilikti turǵyn áıel basqarǵan, ol da jeńil jaraqat alǵan.
Aldyn ala derekter boıynsha, bul oqıǵa ádeıi jasalmaǵan, degenmen tergeý jumystary jalǵasyp jatyr.
Al taǵy bir aýyr jol-kólik oqıǵasy dúısenbi kúni Germanııanyń batysyndaǵy Gısen qalasynda tirkeldi.
Bılik ókilderiniń habarlaýynsha, júrgizýshi Audi markaly avtokólikpen avtobýs aıaldamasyna soǵylyp, saldarynan tórt adam jaraqat alǵan, olardyń bireýiniń jaǵdaıy aýyr.
Gısen qalasynda turatyn, 32 jastaǵy er adam ustaldy. Ol – Ázerbaıjan azamaty bolyp shyqty. Gısen qalasy Frankfýrttan shamamen 53 shaqyrym soltústikte ornalasqan.
«Qazirgi ýaqytta oqıǵanyń naqty mán-jaıy belgisiz», delingen polıtsııanyń málimdemesinde.
Polıtsııanyń habarlaýynsha, júrgizýshi aldymen sol baǵytta qozǵalyp kele jatqan eki avtokólikpen soqtyǵysqan, sodan keıin avtobýs aıaldamasynda turǵan jaıaý júrginshilerdi qaǵyp ketken. Budan soń ol qozǵalysyn jalǵastyryp, keıin toqtatylyp, polıtsııa qyzmetkerleri ony qamaýǵa alǵan. Polıtsııa oqıǵa orny qorshaýǵa alyp, tergeý júrgizip jatyr.
«Qazirgi ýaqytta oqıǵanyń saıası nemese terrorıstik sebeptermen baılanysty bolýy ekitalaı», dep málimdedi Gessen federaldyq jeriniń ishki ister mınıstri Roman Pozek.
Aıta keteıik, byltyr Germanııanyń Magdebýrg qalasynda Rojdestvolyq bazarda kólik bir top adamdy qaǵyp ketti. Oqıǵa saldarynan keminde 11 adam qaza taýyp, 80-nen astamy jaralandy.