Nıderlandyda qurǵaqshylyqqa baılanysty sý tapshylyǵy rejımi engizildi
ASTANA. KAZINFORM — Nıderland úkimeti uzaqqa sozylǵan qurǵaqshylyq, aptap ystyq jáne Reın men Maas ózenderindegi sý deńgeıiniń tómendeýine baılanysty elde «naqty sý tapshylyǵy» rejımin engizdi, dep habarlaıdy Anadoly.
Nıderland úkimetiniń málimetinshe, el sý resýrstaryn basqarý júıesiniń ekinshi deńgeıine ótti. Bul deńgeı «naqty sý tapshylyǵy» rejımin engizýdi kózdeıdi. Mundaı sheshimniń qabyldanýyna uzaqqa sozylǵan qurǵaqshylyq, ystyq aýa raıy jáne shilde aıyna tán emes Reın men Maas ózenderindegi sý deńgeıiniń aıtarlyqtaı tómendeýi sebep bolǵan.
Bılik ókilderi endi sý resýrstaryn basqarý kúsheıtilgen baqylaý rejıminde júzege asyrylatynyn málimdedi.
Sonymen qatar qazirgi jaǵdaıdyń halyqty aýyz sýmen qamtamasyz etýge áser etpeıtini atap ótildi. Degenmen turǵyndarǵa sýdy únemdep paıdalaný jáne orynsyz ysyrap etýden bas tartý usynyldy.
Úkimettiń eskertýinshe, eger jaýyn-shashyn az bolyp, ystyq aýa raıy saqtalsa, qurǵaqshylyq kezeńi uzaqqa sozylýy múmkin.
Sondaı-aq eldiń shyǵysyndaǵy Neımegen qalasy mańynda ózender men sý arnalarynyń deńgeıi óte tómen, ıaǵnı syndarly deńgeıge deıin túskeni habarlandy.
Aıta keteıik, Nıderlandta aptap ystyqtan ólim-jitim jıiledi.
