Nıderlandyda koalıtsııa ydyraǵannan keıin kezekten tys saılaý ótedi
ASTANA. KAZINFORM — Bul týraly euronews-ke silteme jasap habarlaıdy.
Nıderland premer-mınıstri Dık Shoftyń kabıneti, Erkindik partııasynyń (PVV) jetekshisi Gert Vılders mıgratsııalyq saıasatqa baılanysty kelispeýshilikter saldarynan óz mınıstrlerin keri shaqyrtyp alǵannan keıin, tarady.
Úkimettiń taraýy men premer-mınıstr Dık Shoftyń otstavkasynan keıin, 29 qazanda Nıderlandta jańa parlament saılaýy ótetini juma kúni Іshki ister mınıstri ıÝdıt Ýıtermarktyń málimdemesimen rastaldy.
Kezekten tys saılaý tórt partııadan quralǵan koalıtsııa qurylǵannan keıin bir jyl ótpeı jatyp jarııalandy. Koalıtsııa ýltraońshyl Erkindik partııasynyń (PVV) kóshbasshysy Gert Vılderstiń óz mınıstrlerin úkimetten shyǵarýy saldarynan tarady.
Shoftyń 11 aılyq úkimeti Nıderland tarıhyndaǵy eń qysqa merzimdi úkimetterdiń biri retinde tirkeldi.
Vılders koalıtsııadaǵy seriktesterin mıgratsııany shekteý jónindegi usynystaryna jaýap bermedi dep aıyptady.
Ótken aptada ol bosqyndarǵa baspana berýden bas tartýdy jáne qurlyq shekaralaryn qorǵaý úshin armııany paıdalanýdy qosa qamtıtyn, mıgratsııany túbegeıli qysqartýǵa baǵyttalǵan 10 tarmaqtan turatyn josparǵa qol qoıýdy talap etti. Ol eger mıgratsııalyq saıasat qatańdatylmasa, partııasynyń úkimetten shyǵatynyn málimdegen bolatyn.
Krızıstik kezdesý birneshe mınýtqa ǵana sozylyp, Vılders óz ýádesin oryndady, bul ózge partııa lıderleriniń ashýyn týdyrdy. Olar da mıgratsııany shekteýdi qoldaǵandaryn aıtty.
Osy aptada Ulttyq saılaý keńesi 29 qazanda saılaý ótkizýdi usyndy. Saılaýdy erterek ótkizý qıynǵa soǵar edi, óıtkeni parlamenttik demalys 4 shildede bastalyp, 1 qyrkúıekke deıin jalǵasady, odan keıin birneshe aptalyq saılaýaldy naýqan bolady.
Bul birneshe aptadan keıin Gaagada ótetin NATO sammıti kezinde Shof ýaqytsha úkimet basshysy bolyp qala beretinin bildiredi.
Syrtqy ister mınıstri Kaspar Veldkamp úkimettegi saıası daǵdarysqa qaramastan, sammıtti ótkizýdi josparlap otyrǵandaryn aıtty.
Buǵan deıin Nıderlandyda úkimettik koalıtsııa taratylyp jatqanyn jazǵanbyz. Artynsha Nıderland premer-mınıstri Dık Shof otstavkaǵa ketetinin jarııalady.